“Азаматтарға арналған үкімет“ пен ІІМ қызметкерлері жылжымайтын мүлік кадастры жүйесін алдамақ болған

Сыбайлас жемқорлыққа қарсы қызметтің ресми өкілі Данияр Биғайдаров бірыңғай мемлекеттік жылжымайтын мүлік кадастрына жалған мәліметтер енгізу әрекеті туралы хабарлады, - деп хабарлайды Tengrinews.kz тілшісі.
Оның айтуынша, бұл оқиға Өскеменде болған.

"Өскемен қаласының соты "Азаматтарға арналған үкімет" мемлекеттік корпорациясы" КЕАҚ ШҚО филиалының жылжымайтын мүлікті тіркеу бөлімінің бас маманы Қыдырбаева А. мен Қазақстан Республикасы Ішкі істер министрлігінің Көліктегі полиция департаменті бөлімшесінің бастығы Байчин Р.-ға қатысты үкім шығарды. Қыдырбаева "Жылжымайтын мүліктің бірыңғай мемлекеттік кадастры" жүйесіне Байчиннің жылжымайтын мүлкі жоқ екені туралы әдейі жалған ақпарат енгізгені үшін кінәлі деп танылды", – деді Бигайдаров Антикор брифингінде.

Осы үкіммен Байчин жұмыс орнында өз атына тіркелген баспананың жоқтығы туралы жалған анықтама ұсыну арқылы 7,2 миллион теңге көлеміндегі тұрғын үй төлемдерін заңсыз иеленгені үшін айыпты деп танылды.

"Маман 3 жыл 6 ай мерзімге шартты түрде бас бостандығынан айырылды, сондай-ақ 2 жылға квазимемлекеттік сектордағы ақпараттық-коммуникациялық инфрақұрылымға қол жеткізумен байланысты қызметтерді атқару құқығынан айырылды. Ал полиция қызметкері келтірілген залалды толық өтегеніне байланысты 3 жыл 6 ай мерзімге бас бостандығын шектеу жазасына кесіліп, "полицияның аға лейтенанты" арнайы атағынан айырылды", – деп толықтырды спикер.

Сілтемесіз жаңалық оқисыз ба? Онда Telegram желісінде парақшамызға тіркеліңіз!