Шымкентте ерлі-зайыпты заңсыз ішімдік өнімдерін өндіру арқылы табыс тапқан

ҚМА Шымкент бойынша департаменті суррогаттық алкоголь өнімдерін өндіретін жасырын цех қызметінен алынған қылмыстық кірістерді жасыру және заңдастыру схемасын анықтады, - деп хабарлайды Tengrinews.kz тілшісі.
Тергеу барысында 2022 жылдан бастап ерлі-зайыпты Қарсеновтар қолдан жасалған акциздік маркаларын және этил спиртін пайдаланып, заңсыз алкоголь өнімдерін өндіруді ұйымдастырғаны белгілі болды.

"Өнім Шымкентте ғана емес, сондай-ақ көршілес Түркістан және Жамбыл облыстарында да сатылған.
Тінту барысында 9 мың литрден астам этил спирті, 24 мыңнан астам жалған акциз маркалары, әртүрлі маркалы дайын алкоголь өнімдері және 75 млн теңге көлемінде ақшалай қаражат тәркіленді", - делінген хабарламада.

"Follow the money" принципі бойынша жүргізілген қаржылық тергеу нәтижесінде жасырын цехтың 309 миллион теңгеден астам сомадағы барлық қылмыстық кірістері анықталған.

"Қылмыстық жолмен алынған қаражатқа күдіктілер жалпы құны 234 миллион тенге болатын 13 қымбат көлік ("Toyota Land Cruiser 300", "ZEEKR 001", "KIA K8", "Hyundai Grandeur", "VOLVO" және т.б.) сатып алған, тәркілеуден жасыру мақсатында олардың бір бөлігін жақын туыстарына рәсімделген".

Сот үкімі бойынша, аталған тұлғалар заңсыз кәсіпкерлік (ҚК 214-бабының 2-бөлігі, 2-тармағы), акцизделетін тауарлардың таңбалау тәртібі мен ережелерін бұзу (ҚК 233-бабының 2-бөлігі), қылмыстық жолмен алынған ақша мен мүлікті заңдастыру (ҚК 218-бабының 3-бөлігі, 3-тармағы) бойынша кінәлі деп танылды.
Сот оларға 5 және 6 жылға бас бостандығынан айыру жазасын тағайындады. Мемлекет кірісіне қылмыстық жолмен тапқан қаражатқа сатып алынған 13 көлік пен 75 миллион теңге тәркіленді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!