“Полиция бірден ден қоюы тиіс“. Бектенов ІІМ-ге маңызды тапсырма берді

Премьер-министр Олжас Бектенов Құқық бұзушылықтың алдын алу жөніндегі ведомствоаралық комиссияның отырысын өткізді. Қоғамдық қауіпсіздікті қамтамасыз етудің негізгі мәселелері қаралды, - деп хабарлайды Tengrinews.kz тілшісі үкіметтің баспасөз қызметіне сілтеме жасап.
Олжас Бектенов 2024-2028 жылдарға арналған қоғамдық қауіпсіздікті қамтамасыз ету тұжырымдамасының маңызын атап өтті.

"Президент заң мен тәртіп мемлекет пен қоғамның ең басты қағидатына айналуы керектігін айқындап берді.
Бұл – Мемлекет басшысы саясатының басты негіздерінің бірі. Президенттің бұл тапсырмасын бұлжытпай іске асыру – барлық мемлекеттік органның, ең алдымен, құқық қорғау құрылымдарының міндеті. Полиция кез-келген, тіпті кішігірім құқық бұзушылықтарға бірден ден қоюы тиіс. Бұл – құқықтық тәртіпті қамтамасыз етудің бірден-бір жолы
Барлық мүдделі мемлекеттік органдар оны сапалы орындау жөнінде жан-жақты шаралар қабылдауы қажет. Біздің мақсатымыз – құқық бұзушылықтың алдын алудың тұтас жүйесін құру. Тұжырымдаманы іске асыру барысында үкіметтік емес ұйымдар мен қоғамдық бірлестіктерді белсенді тарту қажет. Азаматтардың қауіпсіздік деңгейі біздің бірлескен жұмысымыздың тиімділігіне байланысты", - деді премьер-министр.

Әзірленген Ұрлыққа қарсы іс-қимыл бағдарламасы олардың санын 29 пайызға төмендетуге және қылмыстың ашылуын 54,4 пайызға дейін жақсартуға мүмкіндік берді. Отбасылық-тұрмыстық зорлық-зомбылыққа қарсы күрес бойынша бейінді бөлімшелер құрылған. Енді отбасылық жанжалдарға шақырылған кезде жәбірленушілер туралы сауалнама толтырылады, 1 мың қасақана зәбір көрсетуші анықталып, оларға психокоррекциялық жұмыс жүргізіліп жатқаны айтылды. Өз кезегінде, есепке алынғандарға қатысты электронды бақылау құралдарын қолдану қылмыстың қайталану қаупін 13 пайызға дейін төмендетуге мүмкіндік берді.
eGov жүйесіндегі СТОП-несие функциясы іске қосылды, ол қарыздарды онлайн ресімдеуден бас тартуға мүмкіндік береді. Аталған функцияны бүгінде 1,4 миллионнан астам азамат пайдаланып үлгерген.
Сондай-ақ, Жамбыл және Атырау облыстарының әкімдері тыңдалды, олар "Бейнебақылау жүйелерімен жаппай қамту" жобалары, уақытша бейімдеу орталықтарын ашу және басқа да жобалар аясындағы жұмысты күшейту қажеттігін айтты.

"Біздің мақсатымыз – қылмыстың алдын алудың біртұтас жүйесін құру. Тұжырымдаманы іске асыру барысында үкіметтік емес ұйымдар мен қоғамдық бірлестіктерді белсенді тарту қажет. Азаматтардың қауіпсіздік деңгейі біздің бірлескен жұмысымыздың тиімділігіне байланысты. ІІМ-нің есептерінен елімізде күн сайын ауыр қылмыстар, оның ішінде кісі өлтіру оқиғаларының орын алып отырғанын көріп жүрмін. Адам өліміне әкелетін жазатайым оқиғалардың көпшілігі мас күйінде болады. Биыл бұзақылық пен бандитизмге байланысты ел ішін шулатқан бірқатар оқиға орын алды. Жергілікті полиция қызметкерлері қауіп-қатерді анықтап, тұрғындар арасында алдын ала профилактикалық жұмыстар жүргізуі тиіс", - деді премьер-министр.

Мәдениет және ақпарат министрлігіне мұндай жағдайларға дер кезінде ден қоюды, БАҚ пен әлеуметтік желілерде азаматтарды объективті түрде хабардар етуді тапсырды. Отырыс қорытындысы бойынша премьер-министр Қоғамдық қауіпсіздікті қамтамасыз ету тұжырымдамасын сапалы жүзеге асыру бойынша бірқатар тапсырма берді.

Құқық бұзушылықтың алдын алу аспектілерінің барлығын қамтуды кеңейту, азаматтардың қауіпсіз орта қалыптастыру үшін шешімдер қабылдау процесіне қатысу мүмкіндігін қарастыру, олардың іске асырылуын бақылау;
Жасөспірімдер арасындағы қылмыстың алдын алу үшін кәмелетке толмағандарды оқуға, жұмысқа, қоғамдық өмірге қатысуға ынталандыру тетіктерін қалыптастыру;
Оқу-ағарту министрлігіне мүдделі мемлекеттік органдармен бірлесіп, қосымша шаралар әзірлей отырып, жасөспірімдер арасындағы құқық бұзушылықтың алдын алу саласында іске асырылып жатқан іс-шаралардың тиімділігіне талдау жүргізу;
Ішкі істер министрлігіне есірткінің жаңа түрлері пайда болуын ескере отырып, тиісті бөлімшелердің жұмысын сыни тұрғыдан бағалап, есірткінің заңсыз айналымына қарсы күресті күшейту шараларын қабылдау;
Ішкі істер министрлігіне цифрлық технологиялардың кеңінен енуі алаяқтық санының өсуімен қатар жүретінін ескеріп, азаматтарды алаяқтардан қорғау бойынша түбегейлі шаралар қабылдау тапсырылды.

Сілтемесіз жаңалық оқисыз ба? Онда Telegram желісінде парақшамызға тіркеліңіз!