“Тауарды арзанға жеткізіп беремін“: Астанада 30 адам алаяқтың арбауына түсіп қалған

Алаяқ елорда тұрғындарына Қытай мен Түрікменстаннан халық тұтынатын тауарларды тікелей жеткізуге уәде беретін қылмыстық жоспар құрған, - деп хабарлайды Tengrinews.kz тілшісі.

"Азаматтарды алдау үшін ол WhatsApp мессенджерінде арнайы топтар ашып, тауарларды нарықтық құннан төмен бағамен жарнамалаған. Осылайша, 30 адамның 3 миллион теңгеден астам қаржысын иемденіп, алаяқ ол ақшаны өз қажеттіліктеріне жұмсаған", - делінген хабарламада.

Ведомство мәліметінше, күдікті сотта қылмыстық жауапкершіліктен жалтаруға тырысып, жәбірленушілермен азаматтық-құқықтық қатынаста болғанын көрсеткен.
Мемлекеттік айыптаушы сотталушының бастапқыдан тауар жеткізуді жоспарламағанын және өзіне алған міндеттемелерін орындауға ниеті болмағанын дәлелдеді.

"Сот үкімі бойынша, ол 3 жылға бас бостандығынан айырылды. Келтірілген материалдық шығын сотталғаннан өндірілді.
Астана қаласының прокуратурасы тұрғындарға мессенджерлерде төмен бағамен тауарларды тікелей жеткізуге уәде беретін күмәнді мәмілелерден сақ болуды ескертеді".

Сілтемесіз жаңалық оқисыз ба? Онда Telegram желісінде парақшамызға тіркеліңіз!