"Дөкейлердің мазасын алмасын деп". Министр жүрген қабатқа көтерілген журналисті үкімет жазалады

Press.kz интернет басылымының Астанадағы тілшісі Жәния Ұранқаева жыл біткенше үкімет үйіне кіру құқынан айырылды. Себеп – тілші министрлер кабинетінің отырысы өтетін екінші қабатқа көтерілген. Жақында күшіне енген жаңа ереже бойынша, журналистерге ол қабатқа баруға тыйым салынған-ды. Жәния Ұранқаева Мәдениет және ақпарат министрлігі әзірлеген, ал медиа қауымдастықты алаңдатып қойған БАҚ аккредитациясы туралы жаңа ереже құқын шектеген алғашқы журналист деуге болады.