"Бұрын-соңды бұлай қорқынышты болмаған". Алматылықтар түнгі жер сілкінісін қалай өткерді?

23 қаңтарға қараған түні Қазақстан аумағында жер сілкінді. Жерасты дүмпулері Алматыда қаттырақ сезілді. Түн ішіндегі тосын құбылыстан асып-сасқан жұрт көшеге ұмтылды. Әлеуметтік желіде тараған видеоларға қарағанда, аязда көшеге сырт киімсіз шыққандар көп болған. Кейбірі жалаңаяқ жүр. Ресми дерек бойынша, түнгі бейберекет кезінде кемі сегіз адам жапа шеккен. Оның үшеуі үйдің екінші және үшінші қабатынан секірген.