Екпе алмаған қазақстандықтарға SMS-құттықтау келген: ДСМ пікір білдірді

Қазақстандықтар әлеуметтік желіде вакцинациядан өткені туралы SMS-құттықтаулар келіп жатқанын айтып шағымданды. Алайда шын мәнінде олар екпе алмаған. Тұрғындар осыдан біреулер "ақша таппақ" деп күдіктенген. Вице-министр Бейбіт Есенбаев жағдайдың үш ықтимал себебін атады, - деп хабарлайды Tengrinews.kz тілшісі.
Есенбаев айтқан себептердің бірі - адам факторы. Медицина қызметкері ақпараттық жүйеге басқа науқастың деректерін қате енгізуі мүмкін.

"Екінші нұсқа - медициналық ұйымдар тарапынан ақпаратты әдейі енгізу. Үшінші нұсқа - мобильді деректер базасына нөмірді енгізу кезінде қате болуы мүмкін", - дейді министрдің орынбасары.


Егер тұрғын да, оның балалары да екпе алмаған болса, бұл туралы Әлеуметтік медициналық сақтандыру қорына хабарлау керек.

"Екінші нұсқа - eGovmobile мобильді қосымшасындағы eDensaulyq бөліміндегі ақпаратты түзетуге өтініш беру. Бұл электрон өтініш Әлеуметтік медициналық сақтандыру қорына да түседі және қажетті шаралар қабылданады", - деп сендірді Есенбаев.


Сілтемесіз жаңалық оқисыз ба? Онда Telegram желісінде парақшамызға тіркеліңіз!