ვენსმა და ფაშინიანმა გააფორმეს სამოქალაქო სფეროში ბირთვული თანამშრომლობის შეთანხმება

სომხეთმა და აშშ-მა 9 თებერვალს გააფორმეს შეთანხმება სამოქალაქო ბირთვული ენერგიის სექტორში თანამშრომლობის თაობაზე - აცხადებს სომხეთის პრემიერ-მინისტრი ნიკოლ ფაშინიანი.

ფაშინიანმა შეთანხმება გააფორმა აშშ-ის ვიცე-პრეზიდენტ ჯეი დი ვენსთან, რომელიც სომხეთში ორდღიანი ვიზიტით ჩავიდა.

სააგენტო DPA-ს შეფასებით, ეს მილიარდობით დოლარის ოდენობის შეთანხმება არის ნიშანი იმისა, რომ აშშ შედის უწინ რუსეთის ხელმძღვანელობით მოქმედ სივრცეში - სომხეთს ერთადერთი ბირთვული ელექტროსადგურისთვის საჭირო ტექნოლოგიას მოსკოვი აწვდიდა.

შეთანხმება შესაძლებელს ხდის აშშ-ის 5 მილიარდი დოლარის ღირებულების ტექნოლოგიის ექსპორტს, ასევე ბირთვული საწვავის კონტრაქტებს 4 მილიარდი დოლარის მოცულობით, - განაცხადა ვენსმა ფაშინიანთან შეხვედრის შემდეგ. მის სიტყვებს ავრცელებს სააგენტო DPA.

აშშ-ს აქვს სომხეთის ნდობა საიმისოდ, რომ მას ახალი ტექნოლოგიები მიაწოდოს, - დასძინა აშშ-ის ვიცე-პრეზიდენტმა.

სამხედრო დახმარების სახით, აშშ სომხეთს მიაწვდის V-BAT ტიპის სადაზვერვო დრონებს.

ჯეი დი ვენსის სამხრეთკავკასიური ტურნე ითვალისწინებს ვიზიტს აზერბაიჯანშიც.

2025 წლის აგვისტოში ვაშინგტონის შუამავლობით სამშვიდობო შეთანხმება გაფორმდა სომხეთის პრემიერ-მინისტრ ნიკოლ ფაშინიანსა და აზერბაიჯანის პრეზიდენტ ილჰამ ალიევს შორის - ორ ქვეყანას შორის მთიანი ყარაბაღის რეგიონის გარშემო ათწლეულების განმავლობაში მიმდინარე კონფლიქტის შემდეგ.