სალომე ზურაბიშვილი: ეროვნული გმირის „უაზროდ გაწირულად“ მოხსენიება ქვეყნის ღალატის ტოლფასია არაა?

საქართველოს მეხუთე პრეზიდენტი სალომე ზურაბიშვილი „ფეისბუკზე“ გამოეხმაურა თეა წულუკიანის განცხადებას, რომელმაც აგვისტოს ომის გმირ გიორგი ანწუხელიძეს უწოდა „უაზროდ განწირული ვიღაცის პიარისთვის“ და იკითხა, ეს ქვეყნის ღალატის ტოლფასი ხომ არ არისო.

“კანონის და კონსტიტუციის წინაშე ეს დანაშაული არაა? და ქვეყნის ღალატის ტოლფასი? არაფერი რომ ვთქვათ მორალზე, სინდისზე, პატრიოტიზმზე ან ელემენტარულად ადამიანურ გაფრთხილებასა თუ მორიდებაზე, რაც გვმართებს ყველას ანწუხელიძეს შვილების მიმართ“” - დაწერა სალომე ზურაბიშვილმა.

თეა წულუკიანმა, - რომელიც პარლამენტში „ქართული ოცნების“ შექმნილ დროებით საგამოძიებო კომისიას ხელმძღვანელობს, - 11 აპრილს სატელევიზიო ინტერვიუში კომისიის მიზნებზე ისაუბრა და თქვა:

„ჩვენი [კომისიის] მიზანია იმ პოლიტიკური თანამდებობის პირების... გადაწყვეტილებების შესწავლა და შეფასება. რატომ მოხდა ის, რაც მოხდა. მარტივ ენაზე რომ თქვა, რატომ არ არის დღეს გიორგი ანწუხელიძე სახლში? მე მაქვს ჩემს თანამებრძოლებთან ერთად უფლება, დავსვა ეს კითხვა. ვინ ამიკრძალავს ამ კითხვის დასმას?! ვერავინ“.

„ამ კითხვას ვსვამთ. ყველა ბავშვს ჭირდება თავისი მშობელი სახლში და არა უაზროდ განწირული ვიღაცის პიარისთვის“, - განაცხადა ამის შემდეგ თეა წულუკიანმა საზოგადოებრივი მაუწყებლის პირველი ახრის გადაცემაში, „აქტუალური თემა“.

წულუკიანის მიერ ამ განცხადების გაკეთების შემდეგ მის სახლთან აქცია ჩატარდა. ანწუხელიძე გმირია“, „გაუმარჯოს გმირებს“, „დიდება გმირებს“, „დიდება საქართველოს“, - სკანდირებენ აქციის მონაწილეები.