დონალდ ტრამპი ვაშინგტონში დიდი ბრიტანეთის პრემიერ-მინისტრს ხვდება

თეთრ სახლში დაიწყო აშშ-ის პრეზიდენტ დონალდ ტრამპისა და დიდი ბრიტანეთის პრემიერ-მინისტრ კირ სტარმერის შეხვედრა. წინასწარი დღის წესრიგის თანახმად, ორი ლიდერი ისაუბრებს უკრაინაში ომის დასრულების, ასევე თავდაცვასა და უსაფრთხოებასთან დაკავშირებულ საკითხებზე.

ტრამპთან მოლაპარაკებების დროს, სტარმერი, სავარაუდოდ, დაჟინებით მოითხოვს რუსეთთან სამშვიდობო შეთანხმებების შემთხვევაში უკრაინისთვის უსაფრთხოების ისეთ გარანტიებს, რომლებიც გამორიცხავს მოსკოვის ხელახალ შეჭრას.

"ჩვენ შევძლებთ, ჩვენ მივაღწევთ ამას", - ტელეკომპანია CNN-ის თანახმად, ასე უპასუხა დონალდ ტრამპმა ჟურნალისტს შეკითხვაზე: "შეძლებთ თუ არა, მიაღწიოთ სამშვიდობო შეთანხმებას უკრაინაზე?"

სტარმერი გახდა მეორე ევროპელი ლიდერი, რომელიც ამ კვირაში ხვდება ტრამპს. მანამდე ვაშინგტონში საფრანგეთის პრეზიდენტი ემანუელ მაკრონი ჩავიდა. პარასკევს, 28 თებერვალს, თეთრ სახლში დაგეგმილია ტრამპის მოლაპარაკებები უკრაინის პრეზიდენტ ვოლოდიმირ ზელენსკისთან, რომელიც უკრაინული მედიის თანახმად, უკვე გაემგზავრა ამერიკაში. ვარაუდობენ, რომ ტრამპი და ზელენსკი ხელს მოაწერენ უკრაინაში ბუნებრივი რესურსების მოპოვების შესახებ ერთობლივ შეთანხმებას.

ვიზიტის წინ კირ სტარმერმა ამერიკის შეერთებულ შტატებს მოუწოდა, მხარი დაუჭიროს ევროპულ სამშვიდობო ძალებს, რომლებიც უკრაინაში განლაგდებიან იმ შემთხვევაში, თუ მიღწეული იქნება შეთანხმება ომის დასრულების შესახებ.

მანამდე აშშ-ის პრეზიდენტმა დონალდ ტრამპმა, რომელიც რუსეთთან კონტაქტების დამყარებას ცდილობს, მათ შორის უკრაინაში ომის დასრულების სამშვიდობო ძალისხმევის ფარგლებში, განაცხადა, რომ მხარს დაუჭერს ევროპელი მოკავშირეების მონაწილეობას სამშვიდობო ძალებში და უზრუნველყოფს უკრაინის უსაფრთხოების გარანტიებს, მაგრამ გამორიცხავს სამშვიდობო მისიაში თავად შეერთებული შტატების უშუალო როლს.

რუსეთი კვლავ ეწინააღმდეგება უკრაინაში ევროპის სამშვიდობო ძალების გაგზავნის იდეას. ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა კატარში ვიზიტის დროს გამართულ პრესკონფერენციაზე.

ლავროვის თქმით, რუსეთისთვის ამჟამად არავის უკითხავს უკრაინაში სამშვიდობოების განლაგების შესაძლებლობის შესახებ, თუმცა, როგორც მინისტრმა აღნიშნა, აშშ-ის პრეზიდენტმა დონალდ ტრამპმა საფრანგეთის პრეზიდენტ ემანუელ მაკრონთან ბოლო შეხვედრაზე განაცხადა, რომ სამშვიდობო ძალების განლაგება შესაძლებელია მხოლოდ კონფლიქტის ორივე მხარის თანხმობით.