"ყოველთვის შეიძლება რაღაც გართულება იყოს" - ზურაბ ჩხაიძე მზია ამაღლობელის მდგომარეობაზე

ონლაინგამოცემების, „ბათუმელებისა“ და „ნეტგაზეთის“ დამფუძნებელი და დირექტორი მზია ამაღლობელი დღეს და სავარაუდოდ, ხვალ კლინიკაში დარჩება გამოკვლევების მიზნით. ამის შესახებ „ვივამედის“ კლინიკურმა დირექტორმა ზურაბ ჩხაიძემ "ტვ პირველთან" სატელეფონო საუბარში განაცხადა. რადიო თავისუფლებამ ჯერჯერობით ვერ შეძლო ზურაბ ჩხაიძესთან დაკავშირება. როგორც მან მოკლე ტექსტური შეტყობინებით გვიპასუხა, შეხვედრაზე იმყოფება და პასუხის გაცემას მოგვიანებით შეძლებს.

მისი თქმით, მზია ამაღლობელი მხნედ არის, დასჭირდათ დამატებითი გამოკვლევების ჩატარება და ექიმების მიერ კონსულტირება. "რეკომენდაციებს ითვალისწინებს. მას დანიშნულება უკვე მიცემული აქვს, რომელიც სრულდება და რაზეც თანხმობას აცხადებს და ეს ჩვენ ძალიან გვახარებს".

ზურაბ ჩხაიძის თანახმად, გამოკვლევები ძირითადად უკავშირდება შიმშილობის ეფექტს, რომელიც ადამიანის ორგანიზმზე ზემოქმედებას ახდენს. შეკითხვაზე, რამდენად საგანგაშოა მზია ამაღლობელის მდგომარეობა, ზურაბ ჩხაიძემ უპასუხა:

"რა თქმა უნდა, საგანგაშო მდგომარეობაა და ყოველთვის შეიძლება რაღაც გართულება იყოს. შიმშილობის ეფექტი ორგანიზმზე გავლენას ახდენს”, – უთხრა ზურაბ ჩხაიძემ "ტვ პირველს" სატელეფონო საუბარში.

მზია ამაღლობელი პროტესტის ნიშნად საპატიმროში 26 დღეა შიმშილობს. 4 თებერვალს ის "ვივამედში" გამოკვლევების ჩატარების მიზნით გადაიყვანეს. გამოკვლევების დასრულების შემდეგ მას სურს ციხეში დაბრუნება.

"ვივამედში" მზია ამაღლობელის მონახულების შემდეგ, ადვოკატმა ჯუბა ქათამაძემ მედიას უთხრა, რომ ხვალ, 7 თებერვალს, მზია ამაღლობელის მოსანახულებლად კლინიკაში შესაძლოა შევიდეს სახალხო დამცველის ეგიდით შექმნილი მედიკოსთა ჯგუფი.

ადვოკატის შეფასებით, მზია ამაღლობელის მდგომარეობა უცვლელია და სტაბილურად გრძნობს თავს.

"პალატაში დამხვდა, ჩვეულებრივად დადიოდა, სხვადასხვა საკითხზე ვისაუბრეთ. მადლობა გადაუხადა იმ ადამიანებს, ვინც შიმშილობა შეწყვიტა და ყველას სთხოვა, რომ მის გამო თავგანწირვა არ ღირს. რაც შეეხება "ვივამედში" დატოვების საკითხს, ბატონ ზურა ჩხაიძესაც ვესაუბრე და თვითონ კლინიკამ მოსთხოვა მას, რომ გარკვეული დრო დაყოს კლინიკაში, რათა კვლევები ჩატარდეს. გარკვეული ცვლილებებიც აღმოჩნდა გასტროენტეროლოგიურ კვლევებში. ქალბატონი მზია ითხოვს, რომ კლინიკა დატოვოს და პენიტენციურ დაწესებულებაში დაბრუნდეს. ამბობს, რომ არანაირ შეღავათს არავისგან არ ითხოვს. ხვალ შეიძლება შემოვიდეს სახალხო დამცველის ეგიდით შექმნილი მედიკოსთა ჯგუფი. ხვალ უნდა გაირკვეს, რა სახის კვლევები იქნება საჭირო. გადაეცემათ „ფორმა 100“, რასაც სანდო ექიმები გაეცნობიან და დანარჩენი ხვალ გაირკვევა. ქალბატონი მზიას მოთხოვნა არის, რომ თუ რამე კვლევა არის დარჩენილი, დღეს ჩატარდეს. ხვალ ექიმებიც შემოვლენ და მაქსიმუმ, ხვალ საღამოს პენიტენციურ დაწესებულებაში დააბრუნონ“, - თქვა ჯუბა ქათამაძემ.

მანვე უპასუხა კითხვას, ხომ არ გამეორებულა პალატაში საკვების დატოვების შემთხვევა მზია ამაღლობელთან, რომელიც შიმშილობს.

„კანონმდებლობით გაწერილი ინსტრუქციით, როცა პატიმარს საკვებს სთავაზობენ და ის უარს აცხადებს, ეს საკვები გააქვთ და მან ოქმზე უნდა მოაწეროს ხელი. როცა შევედი, ეს საკვები დატოვებული დამხვდა. შემდგომ პენიტენციურის თანამშრომლებს მოვუწოდეთ და მათ გვითხრეს, რომ სანიტარი გაიტანდა. გარკვეული დროის შემდეგ სანიტარმა გაიტანა. ეს, რა თქმა უნდა, წესების დარღვევაა და ფსიქოლოგიური ზეწოლის ერთ-ერთ იარაღად შეგვიძლია განვიხილოთ იქიდან გამომდინარე, რომ ყველანაირი წესები დაარღვიეს“, - განაცხადა ქათამაძემ.

მზია ამაღლობელის საქმე
მზია ამაღლობელს, - რომელსაც 4-დან 7 წლამდე პატიმრობა ემუქრება პოლიციელისათვის სილის გაწვნის გამო, - კოლეგები, უფლებადამცველი ორგანიზაციები, პოლიტიკოსები საქართველოსა და საზღვარგარეთ პოლიტიკურ პატიმრად მიიჩნევენ.

ის ჯერ ადმინისტრაციული წესით დააკავეს 11 იანვარს, შემდეგ კი გამოუშვეს და რამდენიმე საათში, - უკვე 12 იანვარს, - ხელახლა დააკავეს, ამჯერად სისხლის სამართლის წესით, - რაც, იურისტების შეფასებით, საქმის გარემოებებთან შეუთავსებელია და მხოლოდ პოლიტიკურ მოტივზე მიანიშნებს.

„მედიის თავისუფლების კოალიციის“ (MFC) წევრი 14 ქვეყნის საელჩოებმა 30 იანვარს გამოქვეყნებული ერთობლივი განცხადებით მოითხოვეს „ქართული ოცნების“ ხელისუფლებისგან მზია ამაღლობელის გათავისუფლება.

ამ ქვეყნების მთავრობების გარდა, საერთაშორისო და ადგილობრივი უფლებადამცველი ორგანიზაციები, მრავალი უცხოელი და ქართველი პოლიტიკოსი, 300-ზე მეტი ქართველი ჟურნალისტი და რედაქტორი მოუწოდებენ „ქართული ოცნების“ ხელისუფლებას, მზია ამაღლობელი გათავისუფლდეს პატიმრობიდან.