აშშ-ში არმიის ვერტმფრენისა და სამგზავრო თვითმფრინავის შეჯახებას 67 ადამიანის სიცოცხლე ემსხვერპლა

AP-ის თანახმად, არმიის ვერტმფრენისა და American Airlines-ის სამგზავრო თვითმფრინავის ჰაერში შეჯახების შედეგად დაიღუპა ორივე ბორტზე მყოფი 67-ვე ადამიანი. ამის შესახებ ოფიციალურმა პირებმა 30 იანვარს განაცხადეს.

ვითარების გაანალიზების შედეგად, მათ ასევე თქვეს, რომ ავარიის დროს პერსონალის რაოდენობა საკონტროლო კოშკზე დადგენილ ნორმას არ შეესაბამებოდა.

ეს ამ ქვეყანაში ერთ-ერთი ყველაზე მძიმე საავიაციო კატასტროფაა ბოლო პერიოდში.

რეიგანის სახელობის აეროპორტის მახლობლად ჰაერში ერთმანეთს შეეჯახნენ ავიაკომპანია American Airlines-ის სამგზავრო თვითმფრინავი Bombardier CRJ700 და შეიარაღებული ძალების ვერტმფრენი Black Hawk-ი.

სულ მცირე, 28 ცხედარი ნახეს მდინარე პოტომაკში, სადაც თვითმფრინავი და შვეულმფრენი ჩავარდნენ შეტაკების შემდეგ.

თვითმფრინავში 60 მგზავრი და ეკიპაჟის ოთხი წევრი იყო. ვერტმფრენში სამი ჯარისკაცი იმყოფებოდა. ფედერალური საავიაციო ადმინისტრაციის მოხსენების თანახმად, რომელიც Associated Press-მა მოიპოვა, საკონტროლო კოშკზე საჰაერო მიმოსვლის ერთი მაკონტროლებელი ასრულებდა სამუშაოს, რომელიც ჩვეულებრივ ორი ადამიანის საქმეა.

აშშ-ის პრეზიდენტმა დონალდ ტრამპმა თეთრ სახლში გამართულ პრესკონფერენციაზე განაცხადა, რომ ვერავინ გადარჩა. ტრამპმა 30 იანვარს თქვა, რომ ავიაკატასტროფის დროს რუსეთის მოქალაქეების დაღუპვასთან დაკავშირებით ვაშინგტონს კონტაქტი აქვს მოსკოვთან. „კონტაქტი გვაქვს რუსეთთან“, - განაცხადა ტრამპმა პრესკონფერენციაზე, როცა უპასუხა შეკითხვას, ხელს უწყობს თუ არა აშშ დაღუპულების გვამების რუსეთში დაბრუნებას. „პასუხია, დიახ, ხელს შევუწყობთ“, - თქვა ტრამპმა და დასძინა, რომ თვითმფრინავში სხვა სახელმწიფოთა მოქალაქეებიც იმყოფებოდნენ.

ავიაკატასტროფაზე საუბრისას ტრამპმა ჟურნალისტებს უთხრა, რომ საჰაერო მიმოსვლის კონტროლის სისტემები სათანადოდ არ არის ჩამოყალიბებული. ”მათ ბევრი ფული დახარჯეს სისტემის განახლებაზე", - განაცხადა ტრამპმა. აშშ-ის პრეზიდენტის თანახმად, ახალი სისტემა რომ შეეძინათ, უფრო იაფი დაუჯდებოდათ.

ტრამპმა 30 იანვარს ასევე მიიღო გადაწყვეტილება, რომ ავიაციის მაღალი რანგის ყოფილი წარმომადგენელი სამოქალაქო ავიაციის ფედერალური სამმართველოს ადმინისტრაციის უფროსის მოვალეობის შემსრულებლად დაენიშნა.

გადაწყვეტილება მოჰყვა კატასტროფას, რომელსაც 2001 წლის შემდეგ ყველაზე მეტი ადამიანი ემსხვერპლა აშშ-ში.

ვაშინგტონთან ჩამოვარდნილ თვითმფრინავში იმყოფებოდნენ რუსი მწვრთნელები, ფიგურულ ციგურაობაში მსოფლიოს 1994 წლის ჩემპიონატის გამარჯვებულები ევგენია შიშკოვა და ვადიმ ნაუმოვი. ამერიკული მედიით გავრცელდა შეერთებული შტატების ფიგურული ციგურაობის ფედერაციის განცხადება, რომ თვითმფრინავის მგზავრებს შორის იყვნენ სპორტსმენები, მწვრთნელები და მათი ოჯახების წევრები, რომლებიც კანზასში მდებარე ბაზიდან ბრუნდებოდნენ.

ფედერაციას მათი კონკრეტული რაოდენობა არ დაუსახელებია.

ეს აშშ-ში 2009 წლის შემდეგ სამგზავრო თვითმფრინავის პირველი კატასტროფაა, რომელსაც მსხვერპლი მოჰყვა. 2009 წელს ნიუარკიდან მომავალი Bombardier Q400-ის ტიპის თვითმფრინავი ბაფალოს აეროპორტთან მიახლოებისას შენობას დაეჯახა. დაიღუპა 49 ადამიანი.

1982 წლის იანვარში, ვაშინგტონის აეროპორტიდან აფრენილი Boeing 737 ქალაქის ცენტრში ხიდს შეეჯახა და მდინარე პოტომაკში ჩავარდა. დაიღუპა ბორტზე მყოფი 78 ადამიანი და კიდევ 3, რომლებიც ხიდზე ავტომანქანებით გადაადგილდებოდნენ.