Պատգամավոր դարձած օլիմպիական չեմպիոններ Լաշա Թալախաձեն և Հենո Պետրիաշվիլին չեն կարողացել ինքնուրույն քվեարկել նիստի ժամանակ

Օլիմպիական չեմպիոններ Հենո Պետրիաշվիլին (ըմբիշ) և Լաշա Թալախաձեն (ծանրորդ), որոնք այժմ Վրաստանում իշխող կուսակցության պատգամավորներ են, չեն կարողացել ինքնուրույն քվեարկել խորհրդարանի առաջին նիստում: Նրանց օգնել են խորհրդարանի մյուս անդամները:

Օլիմպիական չեմպիոնները նոր գումարման խորհրդարան են անցել «Վրացական երազանք» կուսակցությունից:

Վրաստանի 11-րդ գումարման խորհրդարանը ստանձնել է լիազորությունները, և, համապատասխանաբար, դադարեցվել են նախորդ գումարման օրենսդիր մարմնի լիազորությունները։ Նիստին ներկա է եղել «Վրացական երազանք» կուսակցության պատվավոր նախագահ, միլիարդատեր Բիձինա Իվանիշվիլին մասնակցել է Վրաստանի նոր գումարման խորհրդարանի առաջին նիստին

Վրաստանի նախագահ Սալոմե Զուրաբիշվիլիի չներկայանալու պատճառով խորհրդարանի առաջին նիստը բացել է ամենատարեց պատգամավոր Լադո Կախաձեն։ Նա շնորհակալություն է հայտնել բնակչությանը Վրաստանի իշխող կուսակցությանը ցուցաբերած աջակցության համար, հայտնում է «Սպուտնիկ» գործակալության վրացական ծառայությունը:

Հայտնի է, որ Զուրաբիշվիլին, ինչպես նաև ընդդիմադիր բոլոր կուսակցությունները հրաժարվել են մասնակցել նիստին, քանի որ հոկտեմբերին կայացած և նոր խորհրդարանը ձևավորած ընտրությունները համարում են կեղծված:

Նորընտիր խորհրդարանը իրավասու է սկսել աշխատանքը, եթե ներկա է նորընտիր օրենսդիր մարմնի ամբողջական կազմի (ընդհանուր 150 մանդատ) մեծամասնությունը: Առաջին նիստին գրանցվել են միայն իշխող «Վրացական երազանք» կուսակցությունից նորընտիր պատգամավորները՝ 89 մարդ։
Զուրաբիշվիլին հայտարարել է, որ Վրաստանի խորհրդարանի նիստը «հակասահմանադրական» է:

«Նախ, զանգվածային ընտրակեղծիքները խաթարել են դրա լեգիտիմությունը: Երկրորդ՝ ես հրաժարվել եմ 1-ին նստաշրջան հրավիրելուց, և Սահմանադրությունը չի ճանաչում որևէ մեկին, ով կարող էր դա անել իմ փոխարեն։ Երրորդ՝ իմ դիմումը Սահմանադրական դատարանին ընթացքի մեջ է», - ասել է նախագահը: