Գերմանիայում չեն կարողանում գտնել հաջողակին, որը վիճակախաղով 1,1 մլն եվրո է շահել

Սաքսոնիա-Անհալթի բնակիչներից մեկը մասնակցել է վիճակախաղի և ճիշտ գուշակել շաբաթ օրվա խաղարկության 49 հնարավոր թվերից բոլոր 6-ը։ Նա դարձել է Գերմանիայում երեք հաջողակներից մեկը, որը գուշակել է «հաջողակ վեցյակը»: Նրա շահած գումարը կազմել է 1,194,215,70 եվրո։

Սակայն նորաթուխ միլիոնատերը, որը տոմսի համար վճարել է 15 եվրո, դեռ կապ չի հաստատել վիճակախաղի կազմակերպիչների հետ, գրում է Bild-ը։ 

«Նման շահումով դուք կարող եք հանգիստ երազել ձեր հաջորդ արձակուրդի մասին։ Ես հաճույքով կհրավիրեմ հաղթողին Մագդեբուրգում գտնվող մեր գրասենյակ՝ անձամբ շնորհավորելու նրան»,- ասել է Lotto-ի գործադիր տնօրեն Ստեֆան Էբերտը:

Շահումը կարելի է ստանալ Սաքսոնիա-Անհալթում գտնվող 630 վիճակախաղի վաճառքի կետերից որևէ մեկում կամ Մագդեբուրգի կենտրոնական գրասենյակում: Անհրաժեշտ է ընդամենը ներկայացնել խաղադրույքի անդորրագիրը: Հաջողակը երեք տարի ունի իր գումարը ստանալու համար։

Գերմանիայում վիճակախաղի շահումները չեն հարկվում, քանի որ դրանք հիմնված են հաջողության վրա: Հարկումը կիրառվում է միայն այն դեպքում, եթե շահումները առաջացնում են լրացուցիչ եկամուտներ, ինչպիսիք են տոկոսները, շահաբաժինները կամ վարձակալության եկամուտները: