«Արսենալ»-ը հաղթել է «Պրեսթոն»-ին, «Մանչեսթեր Յունայթեդ»-ը՝ «Լեսթեր»-ին, «Տոտենհեմ»-ը՝ «Մանչեսթեր Սիթի»-ին

Անգլիայի լիգայի Գավաթի 2024/25թթ․ խաղարկության 1/8 եզրափակչում Լոնդոնի «Արսենալը» «Դիփդեյլ» մարզադաշտում 3։0 հաշվով հաղթել է «Պրեսթոնին»։

Հանդիպման հաշիվը 24-րդ րոպեին բացել է Գաբրիել Ժեզուսը։ Երկրորդ գոլը խփել է Իթան Նվաներին 33-րդ րոպեին։ 57-րդ րոպեին հաշիվը խոշոր է դարձրել Կայ Հավերցը։

Այսպիսով, Անգլիայի լիգայի Գավաթի հաջորդ փուլ դուրս են գալիս «զինագործները»։

Անգլիայի լիգայի Գավաթի 2024/25թթ․ խաղարկության 1/8 եզրափակչի շրջանակում «Մանչեսթեր Յունայթեդը» «Օլդ Թրաֆորդում» 5։2 հաշվով հաղթել է «Լեսթերին»։

Հանդիպման հաշիվը 16-րդ րոպեին բացել է «կարմիր սատանաների» կիսապաշտպան Կասեմիրոն։ 28-րդ րոպեին տանտերերի գեղեցիկ կոմբինացիան ավարտվել է գոլով․ աչքի է ընկել Ալեխանդրո Գարնաչոն։

«Լեսթերը» 33-րդ րոպեին կարողացել է կրճատել հաշվի տարբերությունը։ Բիլալ Էլ Հանուսը կարողացել է գրավել Ալտայ Բայընդըրի պաշտպանած դարպասը։

Բաց թողած գոլից 3 րոպե անց տանտերերի կիսապաշտպան Բրունու Ֆերնանդեշի իրացրած տուգանայինից գնդակն անդրադարձով հայտնվել է Դենի Ուորդի դարպասը։ 39-րդ րոպեին Կասեմիրոն դարձել է դուբլի հեղինակ։

Ընդմիջում գնալուց առաջ «աղվեսները» ևս մեկ անգամ անհանգստացրել են «Մանչեսթեր Յունայթեդի» դարպասապահին․ գոլ է խփել Քոնոր Քոուդին։

Երկրորդ խաղակեսում դուբլ է ձևակերպել նաև Բրունո Ֆերնանդեշը։ Պորտուգալացին իր գոլը խփել է 59-րդ րոպեին։ Այսպիսով, հաջորդ փուլ է դուրս գալիս «Մանչեսթեր Յունայթեդը»։

Ավարտվեց Անգլիայի լիգայի գավաթի խաղարկության 1/8 եզրափակիչի հանդիպումը, որում հանդիպեցին «Տոտենհեմը» ու «Մանչեսթեր Սիթին»։ 

Հանդիպումն ավարտվել է 2-1 հաշվով՝ հօգուտ տանտերերի։ «Տոտենհեմի» կազմում գոլեր խփեցին Վերները և Սարրը: «Ման․Սիթիից» աչքի ընկավ Նունյեսը։