Volkswagen-ը Գերմանիայում կփակի 3 գործարան, կկրճատի աշխատողներին և կնվազեցնի աշխատավարձերը
Գերմանական Volkswagen մեքենաշինական ընկերության տնօրենների խորհուրդը հայտարարել է ծախսերի կրճատման կոշտ պլանի մասին: Տնօրենների խորհրդի ներկայացուցիչների խոսքով՝ կոնցեռնը նախատեսում է ոչ միայն փակել Գերմանիայում տասը գործարաններից առնվազն երեքը, այլև էապես կրճատել մնացած գործարաններում աշխատողների թիվը, գրում է Bild-ը։
Բացի այդ, ընկերության ղեկավարության պլանները ներառում են աշխատավարձերի կրճատում և ամբողջական ստորաբաժանումների անցում արտասահմանյան աութսորսինգի:
«Խոսքը բոլոր տեսակի աշխատանքների մասին է։ Այսպիսով, մեզանից ոչ ոք այլևս չի կարող իրեն ապահով զգալ այստեղ», - ասել է աշխատավորների խորհրդի ղեկավար Դանիելա Կավալոն։
Գերմանիայում VW գործարաններում աշխատում է մոտ 120,000 մարդ, որոնց մոտ կեսը Վոլֆսբուրգի գլխավոր գործարանում։
VW այն աշխատակիցները, որոնք կպահպանեն աշխատատեղերը, կբախվեն աշխատավարձի մոտավորապես 18% կրճատման, կվերացվեն հատուկ հավելավճարները։