Ադրբեջանն ու Ուզբեկստանը համատեղ մարտավարական զորավարժություններ կանցկացնեն

Ադրբեջանն ու Ուզբեկստանը համատեղ մարտավարական հրամանատարաշտաբային զորավարժություններ կանցկացնեն: «Վարպետություն 2024» խորագրով զորավարժությունները կանցկացվեն համակարգչային աջակցությամբ ՝ երկու երկրների պաշտպանության նախարարությունների միջև ստորագրված 2024 թվականի երկկողմ համագործակցության ծրագրին համապատասխան։

Զորավարժություններին, որոնք կսկսվեն սեպտեմբերի 30-ին Ադրբեջանի Ռազմական հրամանատարության ինստիտուտի Ռազմական խաղերի կենտրոնում, կմասնակցեն երկու երկրների ավելի քան 100 զինվորականներ։

Զորավարժությունների հիմնական նպատակն է բարելավել Ադրբեջանի և Ուզբեկստանի բանակների օպերատիվ ստորաբաժանումների փոխգործակցությունը և բարձրացնել նրանց մարտունակությունը, զարգացնել օպերատիվ ստորաբաժանումների հրամանատարների հմտությունները ռազմական որոշումներ կայացնելու, նախաձեռնելու և կառավարելու հարցերում:

Մարտավարական հրամանատարաշտաբային զորավարժությունները կտևեն մինչև հոկտեմբերի 6-ը։