Չլիցենզավորված բուքմեյքերների արգելված գովազդը Հայաստանում չի վերահսկվում՝ Երևանում անցկացվեց խախտումներով հերթական մասշտաբային միջոցառումը (տեսանյութ)

Օգոստոսի 23-ին Մարզահամերգային համալիրում անցկացվեց խառը մենամարտերի սպորտաձևի մրցույթ՝ «Հայաստանի հավաքականն ընդդեմ աշխարհի հավաքականի»:

Իրադարձությունը, իհարկե, սպորտային է ու գրավեց մեծ թվով  սպորտասերների ուշադրությունը, բայց միևնույն ժամանակ Հայաստանի ամենամեծ հարթակներից մեկում անցկացվող միջոցառումը խախտել է Հայաստանի Հանրապետության մի քանի օրենք:

Գլխավոր հովանավորներից մեկը Հայաստանում չլիցենզավորված ռուսական «Վին լայն» բուքմեյքերական ընկերությունն էր:

Հատկանշական է, որ ՀՀ–ում չլիցենզավորված բուքմեյքերական ընկերությունների գործունեությունը արգելված է: «Խաղային գործունեության կարգավորման մասին» ՀՀ օրենքի 5-րդ հոդվածի 8-րդ կետը սահմանում է. «Արգելվում է խաղային գործունեության կազմակերպումն՝ առանց սույն օրենքով սահմանված լիցենզիայի»: Իսկ նշված ընկերությունը ոչ միայն գովազդում էր իր ապրանքանիշը, այլև թիրախավորելով ներկաներին առաջարկում խաղադրույք կատարել, հենց էկրանին ցուցադրելով այդ պահին ընթացող մենամարտի գործակիցները:

Բացի սա՝ «Գովազդի մասին» օրենքը սահմանում է, որ արգելված է շահումով խաղի կամ ինտերնետ շահումով խաղի կամ խաղատան կամ խաղասրահի կամ տոտալիզատորի կամ դրանց կազմակերպիչների ցանկացած տեսակի գովազդը, այդ թվում՝ ռադիոյով, հեռուստատեսությամբ կամ համացանցով՝ բացառությամբ իր պաշտոնական կայքի կամ խաղատների կամ շահումով խաղերի կամ ինտերնետ շահումով խաղերի կամ տոտալիզատորի (խաղասրահ, բուքմեյքերային գրասենյակ) շենքերի, շինությունների կամ սրահների մեջ կամ վրա, Հայաստանի Հանրապետության սահմանային մուտքի կետերում, ինչպես նաև առնվազն չորսաստղանի կարգին համապատասխան որակավորման պահանջներին և չափանիշներին համապատասխան հյուրանոցներում:

Ու նորից բախվում ենք մի իրականության, երբ փաստացի ՀՀ տարածքում անօրինական գործող ընկերությունը մեծ ծավալով գովազդ է իրականացնում բոլոր հնարավոր հարթակներում՝ թվայինից մինչև տպագիր, իսկ ՀՀ օրենքը գործում է միայն տեղական 4 օպերատորների համար:

Ստացվում է՝ օրենքի արգելքը չլիցենզավորված արտասահմանյան բուքմեյքերական ընկերությունների համար չի գործում:

Նշված միջոցառման ժամանակ գովազդների քանակը զարմացնող էր. բուքմեյքերական ընկերության գովազդ կար Համալիրի դիմացի մեծ գովազդային վահանակների վրա, աստիճանների ներքևի մեծ վահանակների վրա:

Բուքմեյքերական ընկերության գովազդը շատ է եղել նաև շենքի ներսում՝ ինչպես տպագիր ձևով, այնպես էլ տեսանյութերի ու ձայնային գովազդի տեսքով: Այս գովազդը օրեր շարունակ ակտիվ տարածվել է նաև սոցիալական հարթակներում և այլ գովազդային հարթակներում մինչև միջոցառումը:

Երևանի քաղաքապետարանից Tert.am-ը հետաքրքրվեց՝ արդյոք արտաքին գովազդների հետ կապված կազմակերպիչները հաստատում ստացել են, ի պատասխան՝ քաղաքապետարանից հայտնեցին, որ գովազդները եղել են Համալիրի տարածքում, ուստի խնդիրը ոչ թե իրենց, այլ հենց Մարզահամերգային համալիրի ղեկավարության տիրույթում է։

Մարզահամերգային համալիրի տնօրեն Կարեն Ղազարյանն էլ Tert.am-ի հետ զրույցում ասաց, որ Մարզահամերգային համալիրը միայն տարածքն է տրամադրել, և մնացած պատասխանատվությունը կազմակերպիչների տիրույթում է:

«Մենք միայն տարածքն ենք տրամադրել, ամբողջ կոնտենտի՝ միջոցառումների, նույնիսկ անվտանգության համար պատասխանատվությունը կրում են կազմակերպիչները: Իրենք մեզնից «սերվիզ» են վերցնում՝ դահլիճ, սպասարկում և այլն: Այնպես որ, եթե մի բան եղել է, դա մեր տիրույթում չէ, մենք որևիցե առնչություն չունենք»,- ասաց նա:

«Իրազեկ և պաշտպանված սպառող» ՀԿ հիմնադիր նախագահ Բաբկեն Պիպոյանն էլ Tert.am-ի հետ զրույցում, անդրադառնալով խնդրին, նշեց՝ այն որ մեր երկրում շատ օրենքներ մնում են թղթի վրա, այդտեղ 2-րդ կարծիք լինել չի կարող:

Նրա խոսքով՝ ամեն դեպքի մասով պետք է կատարվի քննություն: «Պետք է կոնկրետ բողոքի հիման վրա կատարվի կոնկրետ դեպքի քննություն: Քանի որ կան դեպքեր, որ կրում են մասսայական բնույթ, լինում են դեպքեր, որ խախտումը կատարվում է հենց մեկ միջոցառման ժամանակ և դա նախապես կանխատեսելն ու մոնիտորինգ անելը հնարավոր չի լինում: Նշված դեպքը հենց այդպիսին է»,- ասաց նա:

Ճշտող հարցին՝ իրականում հիմա ի՞նչ պետք է տեղի ունենար կազմակերպիչների հետ, նման խախտումների համար, Պիպոյանն ասաց. «Բնականաբար, վարչական սանկցիա պետք է կիրառվեր, բայց էլի եմ ասում՝ ինչ-որ մեկը պետք է դիմի, որ այդ վարչական սանկցիան լինի: Մամուլի հրապարակումը կարող է դիտարկվել որպես բողոք, բայց այդուհանդերձ հարց է առաջանում փաստերի հավաքագրման հետ կապված»:

Նա ևս մեկ անգամ շեշտեց, որ իրականում «Գովազդի մասին» օրենքի հետ կապված կան լուրջ խնդիրներ:

Նշենք, որ սա արդեն 2-րդ դեպքն է նման խախտումներով մեծ միջոցառման: Առաջին «Մերիդիան» կենտրոնում Mac Conference-ն էր, որի ժամանակ տեղ գտած խախտումների մասով ՊԵԿ-ը հսկողական աշխատանքներ է իրականացնում:

Լուսանկարը՝ BlogNews.am-ի