Ռոնալդուն նշել է, թե ինչպես է պլանավորում ավարտել կարիերան Պորտուգալիայի հավաքականում

«Ալ-Նասրի» և Պորտուգալիայի հավաքականի ավագ Կրիշտիանու Ռոնալդուն խոսել է այն մասին, թե ինչպես է նախատեսում ավարտել կարիերան հավաքականում։ Ֆուտբոլիստի խոսքով՝ այդ որոշումը կլինի և՛ ինքնաբուխ, և՛ մտածված, բայց ոչ ոք այդ մասին նախապես չի իմանա։

«Ես անսահման հպարտ եմ, որ ներկայացնում եմ իմ ազգային հավաքականի գույները. դա երազանք է, որն իրականություն է դարձել: Ուստի, երբ որոշեմ հեռանալ Պորտուգալիայի հավաքականից, նախապես ոչ ոքի չեմ զգուշացնի։ Սա շատ ինքնաբուխ որոշում կլինի իմ կողմից, բայց նաև լավ մտածված»,- ասել է Ռոնալդուն NOW TV հեռուստաալիքին տված հարցազրույցում։

Նշենք, որ 39-ամյա հարձակվող Պորտուգալիայի հավաքականի կազմում մինչ օրս մասնակցել է 212 հանդիպման՝ դառնալով 130 գոլի և 45 գոլային փոխանցման հեղինակ։