Արմեն Եգանյանը նշանակվել է Էկվադորում Հայաստանի դեսպան

ՀՀ նախագահ Վահագն Խաչատուրյանի հրամանագիր է ստորագրել, ըստ որի՝ Արմեն Եգանյանը համատեղության կարգով նշանակվել է Էկվադորի Հանրապետությունում Հայաստանի Հանրապետության արտակարգ և լիազոր դեսպան:

«Հիմք ընդունելով վարչապետի առաջարկությունը` համաձայն Սահմանադրության 132-րդ հոդվածի 1-ին մասի 2-րդ կետի և «Դիվանագիտական ծառայության մասին» օրենքի 13-րդ հոդվածի 3-րդ մասի և 14-րդ հոդվածի.

Բրազիլիայի Դաշնային Հանրապետությունում Հայաստանի Հանրապետության արտակարգ և լիազոր դեսպան Արմեն Եգանյանին, համատեղության կարգով, նշանակել Էկվադորի Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Բրազիլիա)»,- ասված է հրամանագրում։

Արմեն Եգանյանը 2018թ․-ի հունիս-օգոստոսին եղել է ՀՀ ԱԳ նախարարի խորհրդական, 2018-2020թթ․–ին` ՀՀ ԱԳՆ քաղաքական ծրագրավորման վարչության պետ, իսկ 2020թ-ից` ՀՀ ԱԳՆ ամերիկյան երկրների վարչության պետ։

Բրազիլիայում ՀՀ դեսպան է նշանակվել 2023 թվականի մարտին։