Астанада тұрғын үй кешені маңында түсірілген видеодағы чемодандарда қанша ақша болуы мүмкін?

Таңертеңнен бері әлеуметтік желілерде Астанадағы тұрғын үй кешендерінің бірінің маңында шашылып жатқан доллар бумалары бейнеленген видео жұртты шулатты. Кадрлардан чемодандар мен сөмкелер көрінеді, олардың ішінде де ақша бар көрінеді. Tengri Life егер барлық купюра 100 долларлық болса, мұндай багажға теориялық тұрғыдан қанша ақша сыюы мүмкін екенін есептеп көрді.
Оқиға орнынан түсірілген видеода жекелеген купюраларды да, тұтас банкнот бумаларын да көруге болады. Олардың жанында полицейлер мен азаматтық киімдегі адамдар жүр.
Олардың бірі бұл 100 долларлық купюралар екенін айтады, бірақ олардың шынайы немесе жалған екенін білмейтінін нақтылайды.
Мессенджерлерде тараған ақпарат бойынша, Atlant ТК маңындағы пандуста шамамен сегіз чемодан болған.

Біздің редакция шартты түрде есептеу жүргізіп, жарияланған кадрларға іліккен багажға қанша жүз долларлық банкнот сыюы мүмкін екенін анықтап көрді.
Видеодан скриншот
Біз видеодан төрт чемодан мен үш сөмкені көрдік.
Видеодан скриншот
Төрт чемодан мен үш сөмкеге қанша ақша сыюы мүмкін?
Есептеу үшін багаждың шартты өлшемдерін алдық. Желідегі кадрларға қарағанда, чемодандар орташа көлемде - биіктігі шамамен 65–70 сантиметр. Мұндай багаждың сыйымдылығы әдетте 60-тан 75 литрге дейін жетеді. Есептеу үшін үш сөмкенің әрқайсысының көлемін шартты түрде 20 литр деп алдық.
Купюралар жүктің ішкі кеңістігінің шамамен 80 пайызын алады деп есептейік, өйткені оны лық толтыру оңай емес. Жүз долларлық банкноттың көлемі шамамен 15,6-ға 6,6 сантиметр, қалыңдығы - 0,11 миллиметрдей. Бір купюраның салмағы - шамамен бір грамм.
Осындай жағдайда орташа көлемдегі төрт чемоданға 169 600-ден 212 мыңға дейін жүз долларлық банкнот сыюы мүмкін. Бұл ақшалай 16,96-дан 21,2 миллион долларға дейін (қазіргі бағам бойынша 7,5-тен 9,4 миллиард теңгеге дейін) болады.
Тағы 42 400-ге жуық банкнот немесе 4,24 миллион доллар (қазіргі бағам бойынша 1,89 миллиард теңге) үш сөмкеге сыюы мүмкін.
Осылайша, төрт чемодан мен үш сөмкедегі жалпы сомасы 21,2-ден 25,44 миллион долларға дейін (қазіргі бағам бойынша 9,43-тен 11,32 миллиард теңгеге дейін) жетуі мүмкін.
Ал әлеуметтік желілерде 6 миллион доллар туралы ақпарат (2,67 миллиард теңге) пайда болды. Бұл ресми түрде расталған жоқ.
Сегіз чемодан болса ше?
Мессенджерлерде тараған мәлімет бойынша, Atlant ТК маңында шамамен сегіз чемодан болған. Егер олардың барлығы орташа көлемде болды деп есептесек, теориялық тұрғыдан 339 200-ден 424 000-ға дейін жүз долларлық банкнот сыюы мүмкін.
Бұл ақшалай 33,92-ден 42,4 миллион долларға дейін (15,09-дан 18,86 миллиард теңгеге дейін) болады. Бұл ақшаның жалпы салмағы, чемодандарды есептемегенде, 339-дан 424 келіге дейін жетеді.
Маңызды: келтірілген барлық сан чемодандар мен сөмкелердің болжамды саны мен көлеміне, олардың толу тығыздығына, сондай-ақ онда болуы мүмкін банкноттардың түрі мен номиналына негізделген шартты математикалық есептеу. Олар табылған ақшаның нақты мөлшерін көрсетпейді. Сегіз чемодан туралы ақпарат та әлеуметтік желілер мен мессенджерлерде тараған және ресми түрде расталмаған.
Доллар салынған чемодандар: Астанадағы тұрғын үй кешені маңында не болды?
Кімдер ұсталды?
Бастапқыда әлеуметтік желіде бұл видео "Самұрық-Қазына" қорының басқарма төрағасы Нұрлан Жақыпов пен "Қазақстан темір жолы" басқарма төрағасы Елжас Отыншиев ұсталғаны туралы хабарламалар аясында талқыланды. Бұл хабарламалардың Atlant ТК маңында шашылған купюралармен байланысы туралы ақпарат әзірге ресми түрде расталған жоқ.
Кейін ҰҚК Жақыпов пен Отышиев, сондай-ақ өзге де тұлғалар жемқорлық қылмыс жасады деген күдікпен ұсталғанын растады.
Тағы оқыңыз: Мансабы, мәлімдемелері және Президент сыны: Нұрлан Жақыпов туралы не белгілі?
Жарты жыл да жұмыс істемеді: ҚТЖ басшысы Елжас Отыншиевтің ұсталғанға дейінгі қызмет жолы