Алматыда тұрғын үй кешенінен өрт шыққан: қаза тапқан әйел туралы белгілі болды

Алматының Әди Шәріпов көшесіндегі тұрғын үй кешенінде кеше болған өрттің мән-жайы белгілі болды. Оқиға салдарынан бір әйел қаза тауып, тағы төрт адам ауруханаға жатқызылды, деп хабарлайды Tengrinews.kz тілшісі қалалық ТЖД-ға сілтеме жасап.
Өрт туралы хабарлама 13 қабатты тұрғын үй кешенінен "101" пультіне 23 тамыз күні сағат 22:49-да түскен. Алғашқы бөлімшелер оқиға орнына бес минут ішінде жетті.
ТЖД мәліметінше, өрт техникалық бөлмеден және екінші кіреберістің қабаттарынан шыққан. Сондай-ақ бірінші кіреберістің 7-ші қабатынан 13-ші қабатына дейінгі электр қалқандары өртенген.

"Құтқару қалпақтарын пайдалана отырып, баспалдақ арқылы 148 адам, оның ішінде 9 бала құтқарылды. Төрт адам ауруханаға жатқызылды. Зардап шеккендердің бірі ес-түссіз күйде табылды. Оқиға орнына келген дәрігерлердің реанимациялық шараларына қарамастан, оны аман алып қалу мүмкін болмады", - деп хабарлады ТЖД.

Өртті сөндіруге ТЖД-ның 90-ға жуық қызметкері мен 25 техникасы жұмылдырылған.

ТЖД өрттің жайылуына оқиға туралы хабарламаның кеш түсуі себеп болуы мүмкін екенін мәлімдеді. Тұрғындардың ақпараты бойынша, автоматты өрт дабылы өрт сөндірушілерді шақыртпас бұрын шамамен бір жарым сағат бұрын іске қосылған.

Дегенмен, тұрғындар тарапынан өртке қарсы қызметке дер кезінде хабарлама түспеген.
Бұған дейін өрт-техникалық тексеру қорытындысы бойынша жауапты тұлғаларға өрт қауіпсіздігі талаптарының анықталған бұзушылықтарын жою туралы ұйғарым берілген болатын.
Өрттің шығу себебі анықталып жатыр.