Месси 899-голини урди: "Интер Майами" «Ди Си Юнайтед»ни мағлуб этди

МЛС мунтазам чемпионатининг 3-турида «Интер Майами» сафарда «Ди Си Юнайтед» билан тўқнаш келиб, 2:1 ҳисобида муҳим ғалабани қўлга киритди. Флорида клуби бу баҳсда ҳам совуққонлик ва аниқлик билан ҳаракат қилиб, уч очкони ўз чўнтагига солиб қўйди.

Учрашувда ҳисоб 17-дақиқада очилди: де Паул ўз имкониятидан унумли фойдаланиб, «Интер Майами»ни олдинга олиб чиқди. Орадан кўп ўтмай, 27-дақиқада Лионел Месси ўз сўзини айтди — у фаолиятидаги 899-голини киритиб, жамоасининг устунлигини мустаҳкамлади.

Иккинчи бўлимда мезбонлар ҳам охиригача курашди. 75-дақиқада Барибо бир гол билан жавоб қайтариб, интригани қайтаришга уринди. Аммо «Интер Майами» қолган вақтда ҳисобни ушлаб қолди ва ўйинни ғалаба билан якунлади.

Шу тариқа, Хавиер Маскерано бошқарувидаги жамоа очколарини 6 тага етказиб олди. «Ди Си Юнайтед» эса 3 очко билан қолди.

МЛС. 3-тур
Ди Си Юнайтед — Интер Майами 1:2
Голлар: Барибо 75 – де Паул 17, Месси 27.

Интер Майами: Слаир, Мура, Фалкон, Силва, Аллен, Силветти (Алленде, 71), де Паул, Брайт, Сеговия (Лужан, 88), Бертераме, Месси.