Анчелотти Роналду интизомини эслаб, тикланиш муҳимлигини айтди

Ҳозир Бразилия терма жамоасини бошқараётган машҳур мураббий Карло Анчелотти Криштиану Роналду ҳақида фикр билдирди. Бу ҳақда euro-football.ru хабар беради.

Анчелоттининг айтишича, Роналду у ишлаган энг профессионаллардан бири. Мураббий бир воқеани ҳам эслади: Роналду бир куни унга «Жуда кўп сув ўсимликни ўлдиради», деган. Бу билан у футболчилар учун тикланиш жараёни жисмоний юкламадан кам эмаслигини таъкидлаган. Анчелоттига кўра, кўплаб жароҳатлар айнан ҳаддан ташқари юклама оқибатида юзага келади.

41 ёшли португалиялик ҳужумчи ҳозир Саудия Арабистонининг «Ал-Наср» клубида тўп сурмоқда. Унинг амалдаги шартномаси 2027 йилнинг ўрталаригача мўлжалланган. Роналду фаолияти давомида беш марта «Олтин тўп»ни қўлга киритган.