Казанның муниципаль парковкалары 23 февральдә бушлай эшләячәк

Казан халкы һәм кунаклары 23 февральдә муниципаль парковкалардан бушлай файдалана алачак. Бу Ватанны саклаучылар көнен бәйрәм итү белән бәйле. Шулай ук машина кую урыннары гадәти рәвештә ял көннәрендә – 21 һәм 22 февральдә түләүсез эшли.

Транспорт комитеты машина йөртүчеләрне юл хәрәкәте кагыйдәләрен үтәргә сорый. «Тукталыш тыела» һәм «Туктап тору тыела» тамгалары астында машина кую, шулай ук чыгу юлларын ябу, юлларда киртә булу һәм хәрәкәттә катнашучыларга комачаулык тудыру тыела. Хокук бозулар элеккечә штрафлар һәм автомобильләрне эвакуацияләүгә китерергә мөмкин.

Исегезгә төшерәбез, муниципаль парковкалар ял һәм бәйрәм көннәрендә бушлай эшли. Эш көннәрендә түләү 8:00 дән 19:00 га кадәр башкарыла.