Мусиала «Бавария»нинг «Айнтраҳт» устидан ғалабасини баҳолади

Мюнхеннинг «Бавария» клуби ярим ҳимоячиси Жамал Мусиала Бундеслиганинг 23-турида «Айнтраҳт»га қарши ўйиндан кейин (3:2) ҳозирги жисмоний ҳолати ва учрашув таассуротлари ҳақида фикр билдирди. Бу ҳақда euro-football.ru хабар беради.

Мусиаланинг сўзларига кўра, у ўзини яхши ҳис қилмоқда, бироқ янада кўпроқ майдонга тушиб, ўйин ритмини тиклаб олиши керак. Шунга қарамай, у «Айнтраҳт»га қарши баҳсдаги ҳаракатларидан мамнун эканини таъкидлади.

Ярим ҳимоячи жамоа рақиб номидан қат’и назар, ҳар доим 100 фоиз энергия ва диққатни сақлаб қолиши шартлигини айтди. Унинг қўшимча қилишича, Дортмунддаги навбатдаги учрашувгача бир ҳафта вақт бор ва бу орада бугунги ўйинда нимаси яхши чиқмаганини таҳлил қилиб, хатолардан сабоқ олиш зарур.

Ҳозирда «Бавария» Бундеслига турнир жадвалида 23 турдан сўнг 60 очко жамғарган ҳолда пешқадам бўлиб турибди.