Чистай районы Яуширмә авылында галимә Рабига Хәкимованы искә алдылар
Чистай районы Яуширмә авылында Казан университетында Татар теле һәм әдәбияты бүлеген ачучы галимә буларак билгеле Рабига Хәкимованы искә алу чарасы үткәрелде. Галимәнең туган авылында оештырылган чара түгәрәк өстәл форматында узды. Бу хакта «Интертат» яза.
- Рабига Афзал кызы Хәкимова (1902 – 1952) Чистай өязе Краснояр волосте (Татарстанның хәзерге Чистай районы) Яуширмә авылында туган. 1804 елда ачылган Казан университеты тарихында 1944 елда Рабига Хәкимованың тырышлыгы белән беренче тапкыр Татар теле һәм әдәбияты бүлеге ачылган.
Чара кунакларын һәм катнашучыларын Яуширмә авыл җирлеге башлыгы Лилия Гәрәева сәламләде. Ул ерак араны якын итеп кайткан кунакларга рәхмәт белдерде һәм мондый чараларның әһәмиятен ассызыклады.
Фото: © «Интертат», Юлай Низаев
Тантана «Әбидә кунакта» театральләштерелгән күренеше белән башланып китте. Тамашаны район мәктәп укучылары тәкъдим итте.
«Хөрмәтле кунаклар, 21 февральдә Халыкара туган телләр көнен бәйрәм итәбез. Әлеге истәлекле көн алдыннан Яуширмә авылы мәктәбенә җыелдык һәм Туган якны өйрәнү музеенда бик зур чара үткәрәбез. Авылыбызның, милләтебезнең горурлыгы булган Рабига Хәкимовага багышлап түгәрәк өстәл уздырабыз», – дип түгәрәк өстәл эшен ачып җибәрде мәктәпнең татар теле һәм әдәбияты укытучысы Лилия Фәсхетдинова.
Түгәрәк өстәл форматында барган чара эшендә Татарстан Дәүләт Советының элекке депутаты, җәмәгать эшлеклесе Сурия Усманова, Россия Туган тел һәм әдәбияты укытучылары ассоциациясе җитәкчесе, филология фәннәре кандидаты Рузилә Фәттахова, ТР атказанган фән эшлеклесе, Казан федераль университеты доценты Гөлфия Һадиева, ТР Фәннәр академиясенең Шиһабетдин Мәрҗани исемендәге тарих институты фәнни хезмәткәре Халидә Бәһаветдинова, Чистай районы мәгариф идарәсенең милли белем бирү буенча методисты Рәмилә Сираҗетдинова һәм медицина ветераны, табибә, туган як тарихына багышланган китаплар авторы Наилә Потеева-Фатыйхова катнашты.
Фото: © «Интертат», Юлай Низаев
Халидә Бәһаветдинова чыгышы барышында архив чыганаклары аша Рабига Хәкимованың тормыш юлын, башкарган хезмәтләрен өйрәнүе турында сөйләде. Ул шулай ук галимәнең биографиясендәге кызыклы фактларга да тукталды.
Рабига Хәкимованың тормыш юлы үткән гасырның зур сынаулары һәм Бөек Ватан сугышы еллары белән бәйле. Партия эшләрендә катнашу, халыкның үзаңын үстерү – боларның барысы да үз заманының алдынгы шәхесе булган мөгаллимә җилкәсенә төшкән. Чарада катнашкан туганнары да аның турындагы истәлекләре белән уртаклашты һәм галимәнең шәхси әйберләрен мәктәп музеена тапшырды.
Иң азактан Сурия Усманова чыгыш ясады. «Барлык катнашучыларга рәхмәт белдерәм. Бүген безнең алда торган төп бурыч һәм максат – Рабига Хәкимованың хезмәтләрен халыкка җиткерү. Аның исемен халкыбыз белергә тиеш. Якташыбызның данлы исемен мәңгеләштерү – туган телне саклауга һәм үстерүгә тиң эш», – дип белдерде ул.
Фото: © «Интертат», Юлай Низаев
Сурия Усманова шулай ук Рабига Хәкимова исемен мәңгеләштерү җәһәтеннән киләсе елда галимә тууга 120 ел тулуга багышлап зурлап конференция үткәрергә, китап нәшер итәргә һәм фильм төшерергә тәкъдим итте. КФУ базасында Казандагы институтлар һәм Татарстан Язучылар берлеге белән киңәшмә оештырырга, Рабига Хәкимованың фәнни эшчәнлеген өйрәнеп, монографияләр һәм башка төр хезмәтләр нәшер итәргә кирәк, диде ул шулай ук.
Искә алу чарасы азагында катнашучыларга Чистай районы мәгариф идарәсенең рәхмәт хатлары тапшырылды. Аннан соң Лилия Фәсхетдинова кунакларны мәктәп музее белән таныштырды.