Арбелоа Мбаппе Роналду рекордини янгилаши ҳақида гапирди

Мадриднинг "Реал" жамоаси бош мураббийи Альваро Арбелоа ҳужумчи Килиан Мбаппенинг юқори натижадорлиги юзасидан фикр билдирди. Бу ҳақда euro-football.ru хабар беради.

Француз футболчи Ла Лигадаги "Валенсия"га қарши якшанба кунги ўйинда яна гол урди. Учрашув "қаймоқранглилар"нинг 2:0 ҳисобидаги ғалабаси билан якунланди. Мбаппе жорий мавсумда 31 ўйинда 38 та гол уриб, бир пайтлар Криштиану Роналду энг зўр йилларида кўрсатган рақамларга яқинлашди.

Арбелоа фикрича, кўпчилик Роналду даражасидаги самарадорликни такрорлаш деярли имконсиз деб ўйлаган, аммо Мбаппе айнан шу йўлдан кетаётгандек. Унинг сўзларига кўра, Роналду тўпурарлик бўйича ортда қолдириш ниҳоятда қийин, чунки Криштиану "бошқа сайёралик" даражасидаги футболчи, бироқ бундай маррага кимдир етса, бу айнан Килиан бўлиши мумкин.

Маълумот учун, Роналду "Реал" тарихидаги энг яхши тўпурар: у 438 ўйинда 450 гол урган. Мбаппе эса "Реал" сафидаги 90 учрашувда 82 марта рақиб дарвозасини ишғол этган.