Россия терма жамоаси FIFA рейтингида уч поғона пастлади

Африка миллатлар кубоги якунланганидан кейинги душанба куни FIFA расмий сайти терма жамоалар рейтингини янгилади. Янгиланиш натижасида Россия терма жамоаси бирданига уч поғонага тушиб, 33-ўриндан 36-ўринга жойлашди. Бу ҳақда euro-football.ru хабар беради.

Ҳозирги рейтингда Россия терма жамоасининг энг яқин қўшнилари — Уэлс (35-ўрин) ва Кот-д’Ивуар (37-ўрин).

Валерий Карпин бошқарувидаги жамоа навбатдаги йиғинни март охирида ўтказади. Ҳозирча яқин йиғиндаги рақиблар эълон қилинмаган. UEFA ва FIFA санкциялари сабаб Россия миллий жамоаси ҳозир фақат ўртоқлик ўйинларида майдонга тушмоқда ва бу учрашувлар натижалари ҳам FIFA рейтингига киритилади.