1 февралдан поезд чипталари нархи ошиши маълум қилинди

«Ўзбекистон темирйўллари» акциядорлик жамияти 1 февралдан мамлакат ичида қатор йўловчи поездлар чипталари нархи қимматлашишини маълум қилди. Расмий ахборотга кўра, юқори тезликда ҳаракатланувчи «Афросиёб» электр поездлари, шунингдек «Шарқ», «Насаф» ва «Ўзбекистон» йўловчи поездлари учун чипта нархлари 15 фоизга кўтарилади.

Компания бу қарорни бир нечта омиллар билан изоҳлаган: юқори тезликда ҳаракатланувчи электр поездларга техник хизмат кўрсатиш ва эҳтиёт қисмлар харажатлари ошгани, электр энергияси ҳамда эксплуатация сарф-харажатлари кўпайгани айтилган. Шунингдек, ҳаракат хавфсизлигини тўлиқ таъминлаш, хизмат сифати ва халқаро стандартлар даражасини сақлаб қолиш, инфратузилмани асраш ҳамда доимий модернизация ишларини давом эттириш зарурати ҳам асос сифатида келтирилган.

«Афросиёб» учун янгиланган чипта нархлари

Эълон қилинган маълумотларга кўра, «Афросиёб» қатновлари бўйича янги тарифлар қуйидагича белгиланган:

Тошкент – Бухоро

• VIP — 1 138 000 сўм

• Бизнес — 760 000 сўм

• Эконом — 509 000 сўм

Тошкент – Қарши

• VIP — 976 000 сўм

• Бизнес — 642 000 сўм

• Эконом — 429 000 сўм

Тошкент – Самарқанд

• VIP — 709 000 сўм

• Бизнес — 455 000 сўм

• Эконом — 311 000 сўм

Маълум қилинишича, тарифларнинг янгиланиши йўловчиларга хизмат кўрсатиш сифатини ушлаб туриш, поездлар инфратузилмасини барқарор ишлатиш ва ҳаракат хавфсизлиги бўйича талабларни кучайтиришга қаратилган.

Қисқа қилиб айтганда, 1 февралдан йўлга чиқишни режалаштирганлар учун “чипта масаласи”ни олдинроқ ҳал қилиб қўйиш керак бўлади: нархлар ўзгаряпти, талаб эса одатдагидек юқори.