Իրանի նախկին թագաժառանգ Ռեզա Փահլավին ԱՄՆ նախագահին կոչ է անում անհապաղ միջամտել՝ «ի պաշտպանություն իրանցի ցուցարարների»
Իրանի վերջին շահի որդին և նախկին թագաժառանգ Ռեզա Փահլավի-ն սոցիալական ցանցում հրապարակած ուղերձում դիմել է ԱՄՆ նախագահին՝ կոչ անելով անհապաղ ուշադրություն դարձնել Իրանում ստեղծված իրավիճակին, աջակցել ազատության համար պայքարող ցուցարարներին և պատրաստ լինել միջամտելու։
Փահլավին նշել է, որ նախորդ գիշեր միլիոնավոր իրանցիներ դուրս են եկել փողոցներ՝ կանգնելով կենդանի փամփուշտների դեմ, իսկ այսօր նրանք բախվել են ամբողջական հաղորդակցական շրջափակման՝ ինտերնետի և ֆիքսված կապի լիակատար անջատման պայմաններում։
Նրա խոսքով՝ Իրանի հոգևոր առաջնորդ Ալի Խամենեին, վախենալով «իր հանցավոր ռեժիմի ավարտից», սպառնացել է փողոցներում գտնվող քաղաքացիներին դաժան ճնշումներով և փորձում է հաղորդակցության անջատումն օգտագործել երիտասարդ ցուցարարներին սպանելու համար։
«Ես կոչ եմ արել ժողովրդին դուրս գալ փողոցներ՝ պայքարելու իրենց ազատության համար և թվով գերազանցելու անվտանգության ուժերին։ Նախորդ գիշեր նրանք դա արեցին։ Ձեր հստակ դիրքորոշումը նույնպես զսպել է ռեժիմի բռնարարներին»,- գրել է Փահլավին՝ ընդգծելով, որ իրավիճակը շտապ է, և ժամանակը վճռորոշ։
Նա հավելել է, որ քաղաքացիները մեկ ժամից կրկին դուրս են գալու փողոցներ և խնդրել է ԱՄՆ նախագահին աջակցել Իրանի ժողովրդին։
«Դուք ապացուցել եք, որ խաղաղության մարդ եք և հավատարիմ եք ձեր խոսքին։ Խնդրում եմ՝ պատրաստ եղեք միջամտել՝ Իրանի ժողովրդին օգնելու համար»,- գրել է Ռեզա Փահլավին։
The post Իրանի նախկին թագաժառանգ Ռեզա Փահլավին ԱՄՆ նախագահին կոչ է անում անհապաղ միջամտել՝ «ի պաշտպանություն իրանցի ցուցարարների» first appeared on MediaLab Newsroom-Laboratory.