Фабио Каннаваро Неаполда Олимпия оловини олиб ўтгани маълум бўлди

Ўзбекистон миллий футбол терма жамоаси бош мураббийи Фабио Каннаваро Олимпия оловини олиб ўтиш маросимида иштирок этди. Бу ҳақда халқаро ахборот манбалари хабар берди. Тантанали тадбир Каннаваронинг туғилиб ўсган шаҳри — Италиянинг Неапол шаҳрида ўтказилиб, спорт мухлислари учун ҳақиқий байрамга айланди.

Маросимда Каннаваро билан бир қаторда Италия спортининг машҳур намояндалари ҳам қатнашди. Улар орасида эшкак эшиш бўйича Олимпия чемпиони Жузеппе Аббаньяле, собиқ футболчи Чиро Феррара ва бошқа таниқли спорт юлдузлари бор эди. Уларнинг иштирокидаги эстафета Неапол аҳли учун унутилмас манзаралар яратди.

Шаҳар бўйлаб байрамона муҳит ҳукм сурди. Асосий тантаналар Неаполнинг энг йирик ва тарихий майдони ҳисобланган Пьяцца-дель-Плебишитода ташкил этилди. Минглаб мухлислар спорт афсоналарини яқиндан кўриш ва Олимпия олови билан боғлиқ тарихий лаҳзаларга гувоҳ бўлиш учун жам бўлишди.

Маълум қилинишича, Олимпия олови эстафетаси Рождество байрамлари муносабати билан 26 декабрга қадар вақтинча тўхтатилган. Бир кун аввал, 23 декабрь куни эса олов қадимий Помпей харобалари ҳудудида олиб ўтилган бўлиб, ушбу тадбирда машҳур актёр Жеки Чан ҳам қатнашган. Бу унинг Олимпия олови эстафетасидаги учинчи иштироки ҳисобланади.

Эслатиб ўтамиз, XXV қишки Олимпия ўйинлари 6–22 февраль кунлари Италиянинг Милан ва Кортина-д'Ампеццо шаҳарларида бўлиб ўтади. Мусобақада 90 дан ортиқ давлатдан 3,5 мингга яқин спортчи иштирок этиши кутилмоқда. Қизиғи, ушбу Олимпиада дастурига илк бор тоғ чанғисида альпинизм бўйича медаллар жамланмаси ҳам киритилган.

Фабио Каннаваронинг мазкур маросимда иштирок этиши нафақат унинг Италиядаги обрў-эътиборини, балки Ўзбекистон футболининг ҳам халқаро майдонда тобора танилиб бораётганини яна бир бор намоён этди.