Криштиану Роналду ММА оламига қадам қўйди

Португалия терма жамоаси ва "Ал-Наср" футбол клуби ҳужумчиси Криштиану Роналду аралаш жанг санъатлари оламига кириб келди. У Испаниянинг WOW FC номли ММА промоушенининг акционерига айланганини маълум қилди.

Бу ҳақда футболчи ўзининг X ижтимоий тармоғидаги саҳифасида эълон қилди. "Мен катта янгиликни эълон қилишдан хурсандман: мен @wowfcmma акционери бўламан!

Ушбу лойиҳа менинг қадриятларимга мос келади – интизом, ҳурмат, бардошлилик ва ҳар доим мукаммалликка интилиш. WOW FC ўзига хос ва кучли бир нарса яратмоқда ва мен ушбу лойиҳага қўшилганимдан фахрланаман", – деб ёзади Роналду.

Роналду ММАга қизиқиши узоқ йиллардан буён мавжуд эканини айтиб, WOW FCни катта ўсиш салоҳиятига эга лойиҳа деб атади. У ушбу ташкилот спортчи сифатида унга яқин бўлган қадриятларни ўзида мужассам этганини ва лигани ривожлантиришга ўз ҳиссасини қўшишни режалаштираётганини билдирди.

WOW FC 2019 йилда ташкил этилган бўлиб, ҳозирда Испаниянинг энг йирик ММА ташкилотларидан бири сифатида танилган. Промоушеннинг элчиларидан бири UFC чемпиони Илиё Топурия ҳисобланади.

WOW FC вакилларининг таъкидлашича, Роналду билан ҳамкорлик ташкилотнинг халқаро кўламда мавқеини мустаҳкамлашга ва Испаниядаги аралаш жанг санъатлари бозорига эътиборни жалб қилишга хизмат қилади.