UFC афсонаси Би-Жей Пенн яна ҳибсга олинди

UFC тарихида икки вазн тоифасида чемпионликни қўлга киритган афсонавий жангчи Би-Жей Пенн яна ҳуқуқни муҳофаза қилувчи органлар эътиборига тушди. 45 ёшли собиқ спортчи 4 ноябрь куни Гавайи оролларида полиция томонидан ҳибсга олинди, деб хабар тарқатди “MMA Fighting” нашри.

Полиция маълумотларига кўра, Пенн учинчи даражали қонунбузарликда айбланмоқда. Ҳодиса юзасидан тергов бошланган ва собиқ чемпион вақтинча 1 000 долларлик гаров эвазига озод этилган.

Баёнотда айтилишича, жабрланувчи полицияга мурожаат қилиб, Пенн уни бир неча бор мушт ва оёқ зарбалари билан уриб, тан жароҳати етказганини билдирган. Бу ҳолатдан кейин жабрланувчи тиббий ёрдам сўраган ва полицияга расман ариза ёзган. Тартиббузарлик соат 11:50 атрофида Ҳило шаҳридаги Леҳуа кўчасида содир бўлган. Офицерлар Пеннни қаршиликсиз ҳибсга олишган.

Бу ҳолат жангчи учун илк эмас. Маълумотларга кўра, 2025 йилнинг ўзида Би-Жей Пенн олтинчи марта ҳибсга олинган. Бундан аввал, май ойида у ўзининг “ҳақиқий оиласи”ни АҚШ ҳукумати алмаштирганини даъво қилган ва ҳозирги яқинларини “сохта одамлар” деб атаганди.

Пеннинг бу сўзлари жамоатчиликда катта муҳокамага сабаб бўлган ва унинг руҳий ҳолати борасида кўплаб саволларни келтириб чиқарган. Собиқ жангчининг яқинлари ҳам унинг сўнгги пайтларда ўзини нотинч тутаётганини ва психик ҳолати жиддий ёмонлашганини айтган.

Би-Жей Пенн UFC тарихида ўз ўрнига эга жангчи ҳисобланади. У енгил ва ярим енгил вазн тоифасида чемпион бўлган кам сонли спортчилардан бири сифатида ММА тарихида муҳрланиб қолган. Бироқ сўнгги йилларда у жанг майдонида эмас, балки шов-шувли ҳодисалар билан оммавий ахборот воситалари сарлавҳасида кўп кўринаётгани спорт жамоатчилигини афсусга солмоқда.

Ҳозирда полиция тергов ишларини давом эттираётгани маълум қилинди. Гаров эвазига озод қилинган жангчининг кейинги тақдири суд қароридан сўнг маълум бўлади.