Rykte ut med store ressursar etter melding om bil i sjøen
0
Klokka 12 tysdag rykte store ressursar ut til Turøy i Øygarden etter melding om bil i sjøen.
Både politipatruljar, politibåt, redningsdykkarar og ambulanse vart sendt til staden.
Det var ein tilfeldig forbipasserande som varsla Hovudredningssentralen i Sør-Noreg om bilen.
Kort seinare vart det konstatert at ingen var i bilen.
– Brannvesenet er framme. Det skal ikkje vere personar i eller rundt bilen, seier Erik Willassen ved Hovudredningssentralen i Sør-Noreg klokka 12.17.
Bilen vart meldt stolen tidlegare i dag, ifølgje operasjonsleiar Ole Ronny Olsen i Vest politidistrikt.
Ein nabo seier til NRK at andre personar i området har vore på staden for å sjekke om noko er stole i nausta deira.