Trump møtte Sør-Afrikas president

Den sørafrikanske presidenten Cyril Ramaphosa er på besøk i USA.

Under eit møte i Det kvite hus onsdag, der pressa var til stades, oppstod det munnhoggeri liknande det president Donald Trump tidlegare i år hadde med Zelenskyj.

Trump kom med fleire grunnlause skuldningar om folkemord på kvite sørafrikanarar mot Ramaphosa. Han hevdar at mange kvite bønder føler seg forfølgde i landet og søker tilflukt i USA. Det melder Reuters.

Sør-Afrika har tidlegare avvist skuldningar om folkemord.

Ramaphosa avviste Trumps påstandar og understreka at slike framstillingar er feilaktige og skadelege for Sør-Afrikas internasjonale omdømme.

Den sørafrikanske presidenten sa at han ønskte å bruke møtet til å rette opp i det han kalla for «feilaktige framstillingar» av landet sitt.

Drapstala i Sør-Afrika er høge, og eit stort fleirtal av ofra er svarte sørafrikanarar.

Tidlegare i mai tok USA imot 59 kvite sørafrikanske bønder som flyktningar, etter at Donald Trump hevda at dei er utsette for forfølging og vald i heimlandet.