Fann 52 timar med overgrepsvideoar

I nær fire år utveksla hordalendingen overgrepsmateriale av born på krypterte meldings- og delingstenester på internett. På datamaskina til mannen i 30-åra fann politiet 10.000 ulovlege filer. Av desse var 414 videoar, med ei samla speletid på 52 timar og 26 minutt.

Overgrepsmaterialet var i hovudsak av gutar i tenåringsalderen, men også av born under fem år.

– Det er i det materialet som er beslaglagt hos sikta tilfelle av grove seksualovergrep mot svært unge born, skriv retten.

Mannen var også direkte i kontakt med born via Snapchat.

Hordalendingen, som tidlegare er dømd for overgrepsmateriale og seksuelt krenkande åtferd, er no dømd til fengsel i eitt år og to månader.

Straffa vart redusert grunna tilståinga. Han samarbeidde også med politiet. Til frådrag i fengselsstraffa kjem 82 dagar som mannen har site i varetekt.