ვოლოდიმირ ზელენსკი: პუტინი ორიენტირებულია ომის გაგრძელებაზე. ...მოსკოვში ახლა არ ეშინიათ

უკრაინის პრეზიდენტი ვოლოდიმირ ზელენსკი აცხადებს, რომ რუსეთის მიერ ცეცხლის შეწყვეტაზე უარს აქვს ერთადერთი მიზეზი: "მოსკოვში ახლა არ ეშინიათ".

14 აპრილის ვიდეომიმართვაში მან ხაზი გაუსვა რუსეთის მხრიდან დემონსტრაციულ უარს ცეცხლის შეწყვეტაზე მაშინ, როცა უკრაინა 34-ეა, რაც დათანხმდა ცეცხლის სრულად და უპირობოდ შეწყვეტას:

"უკვე 34-ე დღეა ნარჩუნდება რუსეთის ღია უარი ცეცხლის შეწყვეტაზე. ახლაც, როგორც ეს წლების განმავლობაში იყო, პუტინი ორიენტირებულია ომის გაგრძელებაზე. ორიენტირებულია ასეთ დარტყმებზე - ხოცვაზე. რუსეთის სახელმწიფო პროპაგანდისტები თავიანთ აუდიტორიას ამზადებენ იმისთვის, რომ მოლაპარაკებები და დიპლომატია შედეგს არ მოიტანს.

მიზეზი ერთადერთია - მათ მოსკოვში ახლა არ ეშინიათ. თუკი არ იქნება საკმარისად ძლიერი ზეწოლა რუსეთზე, ისინი კვლავაც განაგრძობენ იმავეს კეთებას, რასაც მიეჩვივნენ - შემდგომშიც იომებენ. ეს უკვე რუსეთის სახელმწიფოებრივი ჩვევაა - მეზობლებთან ბრძოლა, სიძულვილის ექსპორტი და სიცოცხლის მოსპობა. ყველას გვინდა, რომ ეს შეწყდეს. მშვიდობა საჭიროა და ის უნდა იყოს განგრძობადი".

ვოლოდიმირ ზელენსკი კვლავაც აღნიშნავს ისეთ ფორმატებში მუშაობის მნიშვნელობაზე, რომლებითაც შესაძლებელი იქნება უკრაინის უსაფრთხოების უზრუნველყოფა:

"ჩვენ არა მხოლოდ მზად ვართ სწრაფი მშვიდობისთვის - უკრაინას არც ერთი წამით არ უნდოდა ეს ომი და უკრაინა ყოველდღე იცავს სიცოცხლეს".

უკრაინის პრეზიდენტს სჯერა, რომ ომი მხოლოდ რუსეთის მშვიდობისკენ იძულებით შეიძლება დასრულდეს:

"მსოფლიომ იცის სიმართლე - რა მოხდა და ვინ არის დამნაშავე. და, როცა ომი დასრულდება, მსოფლიოს აბსოლუტურად ზუსტად ეცოდინება - ეს მოხდა იმის გამო, რომ რუსეთი, როგორც აგრესორი, აიძულეს მშვიდობას დათანხმებოდა - აგრესორი, რომელიც უკრაინის მიწაზე მოვიდა 2014 წელს, თერთმეტი წლის წინ. ყველასთვის მნიშვნელოვანია, რომ ამას წლები არ დასჭირდეს".

ორშაბათს სუმიში გრძელდებოდა 13 აპრილის ბალისტიკური დარტყმის შედეგად დაჭრილებისა და დაღუპულების ნანგრევებში ძებნა.

უკრაინის პრეზიდენტის ცნობით, დაღუპულია ოცდათხუთმეტი ადამიანი, ასცხრამეტი დაიჭრა. ორმოცამდე ადამიანი საავადმყოფოებში რჩება, მათ შორის - ბავშვებიც. თერთმეტი ადამიანი მძიმე მდგომარეობაშია.