Думага хәрби хезмәткәрләрне депутатлыкка тәкъдим итүне гадиләштерү турында закон кертелә

Россия хәрби хезмәткәрләренә, шул исәптән махсус хәрби операция катнашучыларына, сайлауларда катнашу өчен сайлау комиссияләренә «башка затлар» аша документлар тапшыру мөмкинлеген бирергә телиләр. Бу, аерым алганда, кандидатлар хезмәт итә торган хәрби частьләрнең командирлары була алачак. Бу хакта РФ Дәүләт Думасының Татарстаннан депутаты Айрат Фәррахов телеграм-каналында хәбәр итте.

«Бу хәрбиләргә, хезмәттә булуга карамастан, депутатлыкка сайлану мөмкинлеген бирәчәк», - дип билгеләде парламентарий.

Үзгәрешләрне «Россия Федерациясе гражданнарының сайлау һәм референдумда катнашу хокукларының төп гарантияләре турында»гы законга кертү тәкъдим ителә. Төзәтмәләр ТР Дәүләт Советы депутатлары белән берлектә әзерләнде.

«Инициативаны гадел һәм бик вакытлы дип саныйм. Безнең ватандашлар, безнең геройлар илнең суверенитетын һәм безнең иминлекне яклый. Аларның күбесе җәмәгатьчелек фикере лидеры булып тора, лаеклы абруйга ия. Аларның тәҗрибәсе, белемнәре муниципаль берәмлекләрне, Россиянең төбәкләрен үстерү өчен бик кирәкле булачак. Бу хакта Президент Владимир Путин Федераль Җыенга юлламасында әйтте», – дип ассызыклады Фәррахов.