Дәүләт Думасында хезмәткәргә түләүле ялны озайту мөмкинлеге турында аңлаттылар

Хезмәткәр «больничный»да булган очракта аның ялын автомат рәвештә озайтачаклар. Бу хакта Дәүләт Думасының Социаль сәясәт комитеты әгъзасы Екатерина Стенякина белдерде. РИА Новости шул хакта яза.

Ул билгеләп үткәнчә, еллык түләүле отпуск вакытында авырган очракта шунда ук «больничный»га китү яхшырак. Шул очракта гына хезмәткәр ял итүне озайта яки аны башка вакытка күчерә ала.

«Ял көннәрен өстәү өчен эш бирүчегә «больничный»га китүегез турында хәбәр итү дә җитә. Эшкә яраксызлык кәгазен дә тапшырырга кирәкми - аның турында оешмага Социаль фонд хәбәр итәчәк», - дип өстәде Дәүләт Думасының Социаль сәясәт комитеты әгъзасы.

Ул белдергәнчә, Россия Хезмәт кодексы нигезендә, «больничный» сәбәпле, эш бирүче отпускны озайтудан яки күчерүдән баш тарта алмый. Өстәвенә, вакытлыча эшкә яраксызлык буенча пособие түләнәчәк.

Шулай ук ялны күчергән очракта хезмәткәргә отпуск акчасын кире кайтарырга кирәкми. Стенякина сүзләренчә, аны яңадан саныйлар һәм киләсе хезмәт хакын түләгәндә исәпкә алалар.