Чаллыда шәһәр халкы мөрәҗәгатьләреннән соң берничә автобусның маршрутын үзгәрттеләр

Чаллы хакимияте шәһәрдә яшәүчеләрнең мөрәҗәгатьләрен өйрәнде һәм берничә автобус маршрутының хәрәкәт итү схемаларын үзгәртергә карар кылды. Бу шәһәр халкының үтенечләрен һәм җәмәгать транспортының ел башыннан эш тәҗрибәсен исәпкә алып эшләнде. Бу хакта автошәһәр мэрының матбугат сәркатибе Римма Мөхәммәтҗанова телеграм-каналында хәбәр итте.

7 номерлы маршрутка элеккеге исеме кайтарылды — ул хәзер янәдән 22 номерлы маршрут дип атала. 13 номерлы маршрут исә яңадан элеккечә Җиңүнең 40 еллыгы урамына керә башлый.

26 номерлы маршрут эшен дәвам итә, әмма аның хәрәкәт схемасы үзгәрә — ул хәзер боҗра кебек була. «<...> ягъни ул «Ит комбинаты» тукталышына керми, ә «Энергетик» мәдәният сарае» тукталышына кадәр бара, «Мәдәният паркы» тукталышына кадәр барып җитмичә борыла, Гостев урамы буйлап Фоменко проспектына кадәр барып җитә һәм хәрәкәт итү схемасының иске вариантындагыча «Пединститут» тукталышына кадәр бара», — дип аңлатты мэрның матбугат сәркатибе.

4/6 номерлы маршрут хәзер Абдулла Алиш урамына кадәр бара, Мәскәү проспектына керә, аннары Автозавод проспекты буйлап Шамил Усманов урамына таба хәрәкәт итә. Шулай итеп, 4 номерлы маршрут Шамил Усманов урамына керә, ә 6 номерлы маршрут кире юнәлешкә таба бара.

«<...> башка маршрутлар үзгәртелгән маршрут челтәре кысаларында йөрүне дәвам итә», - дип ассызыклады Мөхәммәтҗанова.

Моңарчы «Татар-информ» хәбәр иткәнчә, Чаллыда маршрут челтәре үзгәргәннән соң барлыкка килгән күчеп утыру проблемасын лимитсыз юл йөрү карталары ярдәмендә хәл итәргә телиләр.