Рөстәм Миңнеханов махсус операциядә катнашучыларның балалары белән очрашты

Бүген Казанның «Татнефть арена» спорт сараенда Республика чыршы бәйрәменең беренче театральләштерелгән тамашасы башланыр алдыннан Татарстан Рәисе Рөстәм Миңнеханов махсус хәрби операция катнашучыларының балалары һәм фән, спорт, мәдәният һәм иҗтимагый эшчәнлектә үзен яхшы яктан күрсәткән талантлы укучылар белән очрашты. Бу хакта республика җитәкчесе матбугат хезмәте хәбәр итә.

Балалар ТР Рәисен музыкаль номерлар белән сәламләде: чыгышлар татар һәм рус телләрендә әзерләнгән иде. Республика мәгариф һәм фән министры Илсур Һадиуллин очрашуда катнашучы балаларны иң сәләтлеләр дип атады. Бәйрәмгә чакырылган балалар арасында кадет мәктәпләрендә укучылар һәм «Беренчеләр хәрәкәте»нең Татарстан Республикасындагы төбәк бүлеге вәкилләре бар иде.

Очрашуның иң кечкенә кунагы сөйләгәнчә, малайның әти-әнисе балалар бакчасында ук аның бик актив булуына игътибар иткән. Ул дүрт яшеннән «Радужная фантазия» түгәрәгенә йөри. Малайның әнисе балалар бакчасында тәрбияче булып эшли, ә әтисе хәзерге вакытта махсус хәрби операциядә катнаша. «Каникулда әти янына барырга хыялланам! Шулай ук уенчык автомат, бронежилет һәм каска теләр идем», - диде ул.

«Автомат та, бронежилет та була, сатып алабыз», — дип вәгъдә итте малайга Рөстәм Миңнеханов, аның үтенечен тыңлаганнан соң. Малай, үз чиратында, хәрби тематикага шигырь укыды.

Аннары яшүсмерләрнең берсе шулай ук үзе һәм гаиләсе турында сөйләде: ул кадет мәктәбендә укый, ә әтисе һәм абыйсы махсус операция зонасында. Киләчәктә егет кадрлар офицеры булырга хыяллана.

«Кая телисең — шунда барачаксың, димәк. Туган илгә хезмәт итүне сайлавыгызны хуплыйм. Бу бик җаваплы һәм абруйлы! Миннән гаиләңә сәлам һәм шундый егет үстергәннәре өчен рәхмәт әйт. Мондый ул белән белән горурланырга гына була», — диде ТР Рәисе, кадет мәктәбе укучысының тарихын тыңлаганнан соң.

Рөстәм Миңнеханов белән очрашуда бөтен Татарстаннан — Казан, Чаллы, Түбән Кама һәм башка муниципалитетлардан да балалар катнашты. Сөйләшү азагында балалар республика җитәкчесе белән күмәк фото ясады.

Аннан соң ТР Рәисе балаларны Республика чыршы бәйрәмендә котлады, бу хакта «Татар-информ» хәбәр итте.