Финанс министрлыгы махсус операция катнашучылары өчен ташламалы ипотека кертүне хупламады

Россия Финанс министрлыгы, башка ипотека программалары белән бәйле диспропорцияләрне искәртеп, махсус хәрби операциядә катнашучылар өчен ташламалы ипотека программасын булдыру тәкъдимен хупламады. Бу хакта тиешле документка сылтама белән РИА Новости хәбәр итә.

Элегрәк РФ Дәүләт Думасы депутатлары Думаның төзелеш һәм торак-коммуналь хуҗалык комитеты рәисе Сергей Пахомов җитәкчелегендә илнең Финанс министрлыгына махсус операциядә катнашучылар өчен 2 процент ставкалы яңа ташламалы ипотека кредиты программасын билгеләү турында тәкъдим юллады.

«Россия Финанс министрлыгы тәкъдимне хупламый», - диелгән ведомство җитәкчесе урынбасары Иван Чебесков җавабында.

Шул ук вакытта гамәлдә булган ташламалы ипотека программалары ипотека кредиты базарында шактый зур диспропорцияләргә китерде, дип игътибар иттеләр министрлыкта. Сүз «Гаилә ипотекасы», «Ташламалы ипотека», «Ерак Көнчыгыш һәм Арктика ипотекасы», «Авыл ипотекасы», «Россия Федерациясенең яңа субъектлары территорияләрендә ташламалы ипотека» һәм «ИТ-ипотека» турында бара.

Моннан тыш, ташламалы ипотека программаларының шартларын күп тапкыр озайту һәм киңәйтү һәм аларны тагын да киңрәк даирәгә тарату ташламалы ипотеканы локаль ярдәм чарасыннан массакүләм продуктка әйләндерде, дип белдерделәр Финанс министрлыгында. Бу «барлык куелган максатларга, беренче чиратта гражданнар өчен торак сатып алу мөмкинлеген арттыру максатына ирешергә мөмкинлек бирмәде», дип ассызыкладылар ведомствода.

Өстәвенә, гражданнарның аерым категорияләрен торак белән тәэмин итүнең яңа механизмнарын булдыру федераль бюджеттан өстәмә акчалар бүлеп бирүне таләп итәчәк, ә әлеге чыгымнарны каплау өчен чыганаклар билгеләнмәгән.