პუტინი მზად არის, ტრამპს უკრაინაზე მოელაპარაკოს და მზად არის კომპრომისისთვის, რასაც მეორე მხარისგანაც მოელის

რუსეთის პრეზიდენტი ვლადიმირ პუტინი ატარებს დასკვნით პრესკონფერენციას. ის იმართება პირდაპირი ხაზის პარალელურად, რომლის დროსაც ქვეყნის მოსახლეობას შეუძლია პრეზიდენტისთვის შეკითხვების დასმა. რუსეთის ტელევიზიის თანახმად, პუტინის ამ პრესკონფერენციის დროს 2,5 მილიონი შეკითხვა გაუგზავნეს.

როცა უკრაინის თემას შეეხო, პუტინმა თქვა, რომ რუსეთი მზად არის კომპრომისისთვის აშშ-ის არჩეულ პრეზიდენტ დონალდ ტრამპთან შესაძლო მოლაპარაკების დროს და არ წაუყენებს არავითარ პირობებს უკრაინის ხელისუფლებას.

პუტინმა თქვა: "ჩვენ გვსურს მყარი მშვიდობა, არა ზავი".

სახელმწიფო ტელევიზიის ცოცხალ ეთერში ამერიკელი ჟურნალისტის მიერ დასმულ შეკითხვას პუტინმა უპასუხა, რომ მზად არის შეხვდეს ტრამპს, რომელთანაც უკვე წლებია, მისი თქმით, არ უსაუბრია. პუტინი თვლის, რომ რუსეთს ახლა არ აქვს სუსტი პოზიცია, ის ახლა უფრო ძლიერია, ვიდრე 2022 წელს უკრაინაში ომის დაწყებისას იყო.

პუტინმა დასავლეთის ქვეყნებს შესთავაზა „ტექნოლოგიური დუელი“ საჰაერო თავდაცვის სისტემებსა და რუსულ „ორეშნიკის“ რაკეტას შორის. „მოდით, აირჩიონ ობიექტი, მაგალითად, კიევში. დააყენონ იქ თავიანთი ყველა რაკეტსაწინააღმდეგო სისტემა და ჩვენ "ორეშნიკით" დავარტყამთ. მზად ვართ ასეთი ექსპერიმენტისთვის", - თქვა მან.

პუტინმა ასევე თქვა, რომ „უკრაინელები, რომლებსაც ომი სურთ, მალე აღარ იქნებიან, მე მგონია, რომ მალე, ვისაც ომი სურს, აღარ დარჩება. ჩვენ მზად ვართ, მაგრამ მეორე მხარეც უნდა იყოს მზად მოლაპარაკებისთვის და კომპრომისებისთვის". რუსეთის პრეზიდენტმა განაცხადა, რომ მზად არის ყველასთან სასაუბროდ, პრეზიდენტ ვოლოდიმირ ზელენსკისთანაც, მაგრამ ნებისმიერ შეთანხმებას ხელი უნდა მოაწეროს უკრაინის კანონიერმა ხელისუფლებამ, როგორადაც ახლა ის მხოლოდ უკრაინის პარლამენტს მიიჩნევს.

ზელენსკის უფლებამოსილების ვადა ტექნიკურად გაუვიდა, არჩევნები ომის გამო გადაიდო და ის კვლავ უნდა აირჩიონ, რათა მოსკოვმა ის კანონიერ წარმომადგენლად ჩათვალოს შეთანხმებაზე ხელის მოწერისთვის, თქვა პუტინმა.

ჟურნალისტის შეკითხვაზე, 2022 წელი რომ იყოს, თუ დაიწყებდა კვლავ ომს უკრაინაში, პუტინმა უპასუხა, რომ რუსეთი იძულებული იყო ეს გაეკეთებინა და ამიტომ დაიწყო ოპერაცია, მაგრამ ახლა რომ იწყებდეს, უკეთ მოემზადებოდა.