Путин Россия Хөкүмәте эшенә бәя бирде

Россия Президенты Владимир Путин зур матбугат конференциясе белән берләштерелгән туры элемтә барышында РФ Хөкүмәте эше канәгатьләнерлек, нәтиҗәле булуын һәм Хөкүмәт илнең киләчәге өчен күп эшләвен белдерде.

«Киләчәк турында һәрвакыт уйларга кирәк! Иң авыр чорларда, хәтта Бөек Ватан сугышы елларында да, без киләчәкне уйлаганбыз. Соңрак ачыкланганча, уйлап, дөрес тә эшләгәнбез. Безнең Хөкүмәт тә киләчәкне кайгырта, бурычлар, илкүләм максатлар куя. Бу искиткеч», – дип бәяләде Путин.

Моннан тыш, дәүләт башлыгы тармак юнәлешендә эшләүне арттыру начар булмас иде, дип тә искәртте. Производствоның аерым тармаклары үсеше турында уйлау зарурлыгын әйтте. Путин вакытында кабул ителгән карарлар мөһимлегенә дә игътибар юнәлтте.

«Бәяләр үсеше – начар күренеш. Ләкин, макроикътисади күрсәткечләрне саклап калып, аны да җиңәрбез дип ышанам», – дип өстәде РФ Президенты.