Мөхәммәтшин 23 декабрьдә Татарстан Дәүләт Советы утырышында парламент эшенә нәтиҗә ясый

23 декабрьдә җиденче чакырылыш Татарстан Дәүләт Советының алтынчы утырышы узачак. Анда республика парламенты башлыгы Фәрит Мөхәммәтшин быел депутатлар эшенә нәтиҗә ясаячак. Бүген ТР Дәүләт Советы президиумы утырышында шул хакта билгеле булды.

«Дәүләт Советының быелгы соңгы утырышында Дәүләт Советы Рәисенең республика парламенты эше турындагы мәгълүматын тыңлаячакбыз», - диде Дәүләт Советы секретаре Лилия Маврина.

Алдагы сессиянең көн тәртибенә барлыгы 24 мәсьәлә, шул исәптән республиканың җиде закон проекты кертелгән. Аларның барысы да беренче укылышта каралачак.

Аерым алганда, депутатлар «ТР территориясендә төбәк инвестиция проектларын гамәлгә ашырганда салым салуның аерым мәсьәләләрен җайга салу турында», «Салым салуның гадиләштерелгән системасын кулланучы салым түләүчеләр өчен салым ставкаларын билгеләү турында», «Татарстан Республикасында хайваннарга мөнәсәбәт өлкәсендә аерым мәсьәләләрне җайга салу турында», «Махсус хәрби операциядә катнашучы затлар һәм аларның гаилә әгъзаларына социаль ярдәм күрсәтү өлкәсендә мөнәсәбәтләрне хокукый җайга салуның үзенчәлекләре турында»гы законнарга, шулай ук ТР Җир кодексына үзгәрешләр кертә торган канун проектлары хакында фикер алышачак.

Утырыш башланыр алдыннан һәм аның тәнәфесләрендә «Теләкләр чыршысы» хәйрия акциясе уза. Аның ярдәмендә сәламәтлек мөмкинлекләре чикле балалар, ятимнәр, шулай ук аз тәэмин ителгән һәм махсус хәрби операциядә катнашучыларның гаиләләрендә тәрбияләнүче балаларның Яңа ел хыяллары чынга ашачак.