Синоптиклар Татарстанда кар, җепшек кар һәм +1 градуска кадәр җылы фаразлый

Якшәмбе, 1 декабрьдә, Татарстанда аязучан болытлы һава торышы көтелә. Кар, җепшек кар һәм секундына 10 метрга кадәр тизлек белән исүче җил фаразлана. бу хакта ТР Гидрометеорология үзәге хәбәр итә.

Һава температурасы төнлә -5..-1 градус була, ә көндез термометр баганалары -3..+1 градус күрсәтә.

Синоптиклар шулай ук юлларда бозлавык булу турында кисәтә.

ТР Гидрометеорология үзәге мәгълүматларына караганда, республикада кышның беренче ае җылы, ә явым-төшемнәр норма чикләрендә була.