Фәрит Мөхәммәтшин Иран тышкы эшләр министры урынбасары белән очрашты

ТР Дәүләт Советы Рәисе Фәрит Мөхәммәтшин Иран тышкы эшләр министры урынбасары Вахид Җәләлзадә белән очрашты. Яклар Россия-Иран хезмәттәшлеге кысаларында Татарстан белән Иран Ислам Республикасы арасындагы үзара бәйләнеш, шул исәптән парламентара элемтәләрне киңәйтү мәсьәләләре хакында фикер алышты. Бу хакта ТР Дәүләт Советының матбугат хезмәтендә хәбәр иттеләр.

«Иран Татарстанның тышкы сәүдә партнерлары арасында аерым урынны били, соңгы елларда товар әйләнеше 200 миллион доллар билгесенә якынлашып килә, - дип искәртте Мөхәммәтшин, очрашуны ачып. – Мәдәни һәм гуманитар элемтәләребез дә нык. Республика югары уку йортларында ике меңнән артык Иран студенты белем ала».

Иран тышкы эшләр министры урынбасары билгеләп үткәнчә, гуманитар хезмәттәшлектән тыш, икътисади элемтәләрне дә киңәйтергә, шулай ук хезмәттәшлекнең төрле юнәлешләрен (әйтик, туризм өлкәсендә) эзләргә кирәк.

«Безнең туристлык тармагын үстерүдә зур потенциалыбыз бар, - диде Җәләлзадә. – Казаннан Тәһранга яки безнең башка шәһәрләргә туры рейсларны яңадан ачу турындагы мәсьәләне күтәрергә кирәк дип саныйм».