18-ամյա երիտասարդի մոտ թմրամիջոց է հայտնաբերվել (տեսանյութ)

Համայնքային ոստիկանության Եղեգնաձորի բաժնի և ՔՈԳՎ Վայոց ձորի մարզային վարչության ծառայողներն ու մարզի պարեկները, իրացնելով ստացված տեղեկություններն ու համատեղ ձեռնարկելով օպերատիվ-հետախուզական միջոցառումներ, պարզել են, որ Արենի գյուղի բնակիչ 18-ամյա երիտասարդը Կապի գլուխ կոչվող տարածքում և իր կողմից շահագործվող «Մերսեդես» մակնիշի ավտոմեքենայի մեջ թմրամիջոց է պահում: Այս մասին հայտնում են ՆԳՆ-ից:

Հետագա միջոցառումներով երիտասարդը վերոհիշյալ տարածքում հայտնաբերվել և տեղափոխվել է Համայնքային ոստիկանության Եղեգնաձորի բաժին: «Մերսեդեսը» տեղափոխվել է բաժնի պահպանվող հատուկ տարածք:

Անձնական խուզարկությամբ երիտասարդի մոտ հայտնաբերվել են 2, 32 գրամ՝ դեղնականաչավուն  և 7,79 գրամ՝ սպիտակ, յուրահատուկ հոտով զանգվածներ: Նա հայտնել է, որ հայտնաբերված թմրանյութն անձնական օգտագործման համար է:

Կազմված փաստաթղթերն ուղարկվել են Վայոց ձորի մարզի քննչական վարչություն: Նախաձեռնվել է քրեական վարույթ: Հանգամանքները պարզվում են: