Мәскәүдә Ренат Ибраһимов каберенә чәчәкләр куйдылар

РСФСР һәм Татарстан халык артисты Ренат Ибраһимовның туган көнендә Мәскәүдә ТР Тулы вәкаләтле вәкиле урынбасары Эмиль Фәйзуллин Волково мөселман зиратында җирләнгән артистның каберенә чәчәкләр куйды. Бу хакта Татарстанның Россиядәге Тулы вәкаләтле вәкиллеге матбугат хезмәтендә хәбәр иттеләр.

Җырчыны искә алырга Мәскәү татарлары автономиясе вәкилләре, артистның дуслары һәм хатыны Светлана килгән.

Ренат Ибраһимов 1947 елның 20 ноябрендә Львов шәһәрендә туган. Бөтенсоюз дәрәҗәсендә уңыш һәм танылуга ул 1975 елда «Красная гвоздика» җыр конкурсында катнашканнан соң ирешә. Бәйгедә Ибраһимов төп премияне яулый.

1978 елда ул «Наш город» җыры белән ел саен үткәрелә торган «Ел җыры» фестивалендә катнаша.

1978 елда Ибраһимовка ТАССРның халык артисты исеме бирелә. 1979 елда ул Габдулла Тукай исемендәге премия лауреаты була. 1981 елда җырчы РСФСРның халык артисты исеменә лаек була.